ಸೋಮವಾರ, ಸೆಪ್ಟೆಂಬರ್ 2, 2013

ಮಿಹಿರ್ ಸೆನ್

ಮಿಹಿರ್ ಸೆನ್

ಮಿಹಿರ್ ಸೆನ್ ಇಂಗ್ಲೆಂಡಿಗೆ ಬ್ಯಾರಿಸ್ಟರ್ ಓದಲು ಹೋಗಿದ್ದರು.  ಓದಿನ ಜೊತೆಗೆ ಅವರಲ್ಲಿ  ಈಜುವುದರಲ್ಲಿ ಆಸಕ್ತಿ ಹುಟ್ಟಿಕೊಂಡಿತ್ತು.  ಆ ಆಸಕ್ತಿ ಬೆಳೆದ ಪರಿಯಾದರೂ ಎಂಥದ್ದು!.  ಸಪ್ತಸಾಗರಗಳನ್ನೂ ದಾಟುವಷ್ಟು.  ವಿಶ್ವದ ಬಹುತೇಕ  ಎಲ್ಲಾ ಸಾಗರಗಳನ್ನೂ ಈಜಿದ ಈ ಮಹಾನ್ ಮಿಹಿರ್ ಸೇನರು ಹುಟ್ಟಿದ್ದು ನವೆಂಬರ್ 16, 1930ರ ವರ್ಷದಲ್ಲಿ.

ಮಿಹಿರ್ ಸೆನ್ ಅವರ ತಂದೆ ಕಟಕ್ ನಗರದಲ್ಲಿ ವೈದ್ಯರಾಗಿದ್ದರು.  ಇಂಗ್ಲೆಂಡಿಗೆ ಬಾರ್ ಪರೀಕ್ಷೆಗಳಲ್ಲಿ ಸಿದ್ಧತೆ ನಡೆಸುತ್ತಿದ್ದ ಮಿಹಿರ್ ಸೆನ್ನರಿಗೆ ಇಂಗ್ಲಿಷ್ ಕಡಲ್ಗಾಲುವೆಯಲ್ಲಿ ಈಜಬೇಕೆಂಬ ವಾಂಛೆ ಹುಟ್ಟಿತು.  ಹಲವಾರು ಬಾರಿ ಪ್ರಯತ್ನಿಸಿ ಸೋತರೂ ಕಡೆಗೆ ಸೆಪ್ಟೆಂಬರ್ 27, 1958ರಂದು ಇಂಗ್ಲಿಷ್ ಕಡಲ್ಗಾಲುವೆಯನ್ನು ಯಶಸ್ವಿಯಾಗಿ ಈಜಿ ಆ ಸಾಧನೆಗೈದ ಪ್ರಪ್ರಥಮ ಭಾರತೀಯರಾದರು.

ಮಿಹಿರ್ ಸೆನ್ನರ ಎರಡನೆಯ ಈಜು ಸಾಹಸ, ಶ್ರೀಲಂಕೆಯ ತಲೈಮನ್ನಾರ್ ಪ್ರದೇಶದಿಂದ ಭಾರತದ ದಕ್ಷಿಣಭಾಗದ ಧನುಷ್ಕೋಟಿಯವರೆಗೆ.  ಇದಕ್ಕೆ ಅವರು ತೆಗೆದುಕೊಂಡ ಅವಧಿ 25 ಗಂಟೆ 44 ನಿಮಿಷಗಳು.  ಈ ಹಾದಿ ತಲುಪಲು ಅವರು ಪಾಲ್ಕ್ ಸ್ಟ್ರೈಟ್ಎಂಬ ವಿಷಪೂರಿತ ಹಾವು ಮತ್ತು ಭಯಾನಕ ತಿಮಿಂಗಿಲಗಳ ಪ್ರದೇಶಗಳನ್ನು ಕೂಡಾ  ಹಾಯ್ದು ಬರಬೇಕಿತ್ತೆಂಬುದು ಗಮನಾರ್ಹವೆನಿಸಿತ್ತು.  ಅವರ ಈ ಸಾಹಸಕ್ಕೆ ಭಾರತೀಯ ನೌಕಾದಳ ಸೇನೆಯು ಸಹಕಾರ ನೀಡಿತ್ತು. 

1966ರ ವರ್ಷದ ಆಗಸ್ಟ್ ಮಾಸದಲ್ಲಿ ಮಿಹಿರ್ ಸೆನ್ ಅವರು ಸ್ಟ್ರೈಟ್ ಆಫ್ ಗಿಬ್ರಾಲ್ಟರ್ಅನ್ನು 8 ಗಂಟೆ 1 ನಿಮಿಷದ ಅವಧಿಯಲ್ಲಿ ಕ್ರಮಿಸಿ ಆ ಸಾಧನೆಯನ್ನು ಗೈದ ಪ್ರಪ್ರಥಮ ಏಷಿಯಾ ನಿವಾಸಿಯೆನಿಸಿದರು.  ಅದೇ ವರ್ಷದ ಸೆಪ್ಟಂಬರ್ ಮಾಸದ 12ನೆಯ ತಾರೀಖಿನಂದು  ಅವರು ಡಾರ್ಡನೆಲ್ಲೆಸ್ಮತ್ತು ಅದಾದ ಒಂಭತ್ತು ದಿನಗಳ ಅಂತರದಲ್ಲೇ ಬೋಸ್ಫೋರಸ್ಗಳನ್ನು ಈಜುತ್ತಾ ಕ್ರಮಿಸಿದರು.  

ಮಿಹಿರ್ ಸೆನ್ನರು ಪನಾಮ ಕಡಲ್ಗಾಲುವೆಯ ಈಜುವಿಕೆಯನ್ನು ಎರಡು ಹಂತಗಳಲ್ಲಿ ಕೈಗೊಂಡು ಅಕ್ಟೋಬರ್ 26, 1966ರಂದು ತಮ್ಮ ಯಾತ್ರೆಯನ್ನು ಪ್ರಾರಂಭಿಸಿ, ಅದೇ ತಿಂಗಳ ಅಕ್ಟೋಬರ್ 31ರಂದು ಒಟ್ಟು 34ಗಂಟೆ 15 ನಿಮಿಷಗಳ ಆ ಯಾತ್ರೆಯನ್ನು ಪೂರ್ಣಗೊಳಿಸಿದರು. 

ಹೀಗೆ ಮಿಹಿರ್ ಸೆನ್ನರು ಐದು ಖಂಡಗಳ ಸಪ್ತ ಸಮುದ್ರಗಳ ಮೇಲೆ ಈಜಿದವರೆನಿಸಿದರು.  ಇಡೀ ವಿಶ್ವದಲ್ಲೇ ಇಂಥಹ ಅಮೋಘ ಸಾಧನೆ ಮಾಡಿದ ಪ್ರಥಮರವರು.  ಈ ಏಳು ಯಾತ್ರೆಗಳಲ್ಲಿ ಆರು ಯಾತ್ರೆಗಳನ್ನು 1966ರ ಒಂದೇ ವರ್ಷದಲ್ಲಿ ಪೂರೈಸಿದ್ದು ಅವರ ಸಾಮರ್ಥ್ಯಕ್ಕೆ ಹಿಡಿದ ಕನ್ನಡಿಯಾಗಿದೆ.   ಅವರು ಸಮುದ್ರ ಸಾಗರಗಳ ಮೇಲೆ ಕ್ರಮಿಸಿದ ಒಟ್ಟಾರೆ ದೂರ 600 ಕಿಲೋ ಮೀಟರುಗಳಿಗೂ ಅಧಿಕವಾದದ್ದು. 

ಭಾರತ ದೇಶವು ಮಿಹಿರ್ ಸೆನ್ನರನ್ನು  1959ರ ವರ್ಷದಲ್ಲಿ ಪದ್ಮಶ್ರೀಮತ್ತು 1967ರ ವರ್ಷದಲ್ಲಿ ಪದ್ಮಭೂಷಣಪ್ರಶಸ್ತಿಗಳಿಂದ ಗೌರವಿಸಿತು.  


ಮಿಹಿರ್ ಸೆನ್ನರು ವೃತ್ತಿಯಲ್ಲಿ ಬ್ಯಾರಿಸ್ಟರ್ ಆಗಿ, ಇಂಗ್ಲೆಂಡಿನ ಕೋರ್ಟ್ ವ್ಯವಹಾರಗಳಲ್ಲಿ ಅಲ್ಲಿಯ ಬಾರ್ ಅನ್ನು  ಪ್ರತಿನಿಧಿಸಿದ್ದರು. ಅವರು  ಭಾರತದ ಎಕ್ಸ್ ಪ್ಲೋರರ್ ಕ್ಲಬ್ಸಂಸ್ಥೆಯ ಅಧ್ಯಕ್ಷರಾಗಿದ್ದರು.  1997ರ ವರ್ಷದಲ್ಲಿ ಈ ಲೋಕವನ್ನಗಲಿದ ಮಿಹಿರ್ ಸೆನ್ನರು ತಮ್ಮ ಅಂತಿಮ ಅವಧಿಯಲ್ಲಿ ಸ್ಮೃತಿ ಸಾಮರ್ಥ್ಯವನ್ನು  ಕಳೆದುಕೊಂಡು ನೋವಿನಿಂದ ಕೂಡಿದ ಬಾಳನ್ನು ಬಾಳಿದರು.  ಸಪ್ತ ಸಾಗರಗಳನ್ನು ದಾಟಿದವರಿಗೂ ನೋವು ಮರಣಗಳು ತಪ್ಪಿದ್ದಲ್ಲ.  ಆದರೆ ಮಾನವ ತನ್ನ ಸಾಧನೆಗಳ ಮೂಲಕ ಅವೆಲ್ಲವನ್ನೂ ಮೀರಿ ತನ್ನನ್ನು ಈ ವಿಶ್ವದಲ್ಲಿ ಉಳಿಸಿಹೋಗಬಲ್ಲ ಎಂಬುದನ್ನು ಮಿಹಿರ್ ಸೆನ್ನರು ತಮ್ಮ ಬಾಳಿನಲ್ಲಿ ಯಶಸ್ವಿಯಾಗಿ ದಾಖಲಿಸಿ ಹೋಗಿದ್ದಾರೆ.

Tag: Mihir Sen

ಕಾಮೆಂಟ್‌ಗಳಿಲ್ಲ: