ಗುರುವಾರ, ನವೆಂಬರ್ 14, 2013

175 ತುಂಬಿದ ಟೈಮ್ಸ್ ಆಫ್ ಇಂಡಿಯಾ


ಕಳೆದ 175 ವರ್ಷಗಳಿಂದ 'ದಿ ಟೈಮ್ಸ್ ಆಫ್ ಇಂಡಿಯಾ' ಭಾರತದ ಕತೆ ದಾಖಲಿಸುತ್ತಿದೆ; ವಸಾಹತು ಶಾಹಿಯಿಂದ ಸ್ವಾತಂತ್ರ್ಯದವರೆಗೆ, ರಾಷ್ಟ್ರದ ಹುಟ್ಟಿನಿಂದ ಇಂದಿನವರೆಗೆ ಈ ಮಹಾನ್ ದೇಶ ಪಯಣಿಸಿದ, ಹೊರಳಿದ, ತುಳಿದ ಪ್ರತೀ ದಾರಿಯ ವಿವರವನ್ನು ಪತ್ರಿಕೆ ಬರೆದಿಟ್ಟಿದೆ. ಪ್ರಾರಂಭಿಕ ದಿನಗಳಲ್ಲೂ ಕುಗ್ರಾಮದ ಕತೆ ಹೆಕ್ಕಿ ತಂದು ವಾಚಕರಿಗೆ ಹೇಳಿದೆ.

ಆರಂಭದಲ್ಲಿ ವಾರದಲ್ಲಿ ಎರಡು ಬಾರಿ ಪ್ರಕಟಣೆ ಕಾಣುತ್ತಿದ್ದ 'ಬಾಂಬೆ ಟೈಮ್ಸ್ ಆಂಡ್ ಜರ್ನಲ್ ಆಫ್ ಕಾಮರ್ಸ್' ಇಂದು ಜಾಗತಿಕ ಸಂಸ್ಥೆ. ನಂತರದ ಅವತಾರ 'ದಿ ಟೈಮ್ಸ್ ಆಫ್ ಇಂಡಿಯಾ' ಜಗತ್ತಿನಲ್ಲೇ ಅತಿ ಹೆಚ್ಚು ಪ್ರಸಾರವುಳ್ಳ ಇಂಗ್ಲಿಷ್ ದೈನಿಕ. ಇದರ ಓದುಗರ ಸಂಖ್ಯೆ 1.48 ಕೋಟಿಯ ಸರಹದ್ದು ದಾಟಿಯಾಗಿದೆ.

ಜಗತ್ತಿನ ಪ್ರತಿ ಮೂಲೆಯ ಮೇಲೂ ಗಮನ ಇಟ್ಟು ಸುದ್ದಿ ಮಾಡಿದ, ಹಂಚಿದ, ಓದುಗರ ದನಿಯಾದ ಪತ್ರಿಕೆ ತನ್ನ ಪ್ರಾರಂಭಿಕ ದಿನಗಳಲ್ಲಿ ಬಾಂಬೆ ಷೇರು ವಿನಿಮಯ ಕೇಂದ್ರದ (ಬಿಎಸ್‌ಇ) ಸ್ಥಾಪನೆಗಾಗಿ ಅಭಿಯಾನ ಕೈಗೆತ್ತಿಕೊಂಡಿತು. 1874ರ ಅ.16ರಂದು ಅದರ ಹೋರಾಟಕ್ಕೆ ಗೆಲುವಾಯಿತು. ಇಂದು ಬಿಎಸ್‌ಇ ತನ್ನ ಬಂಡವಾಳ ಮಾರುಕಟ್ಟೆಯ ಲೆಕ್ಕದಲ್ಲಿ ಪ್ರಪಂಚದ ಹತ್ತನೇ ದೊಡ್ಡ ಸ್ಟಾಕ್ ಎಕ್ಸ್‌ಚೇಂಜ್ ಎನಿಸಿಕೊಂಡಿದೆ.

ರಾಷ್ಟ್ರಪಿತ ಮಹಾತ್ಮ ಗಾಂಧಿ ಮುನ್ನೆಲೆಗೆ ಬಂದು ಸ್ವಾತಂತ್ರ್ಯದ ಕಿಚ್ಚು ಹಚ್ಚಿದ ತಕ್ಷಣ ಪತ್ರಿಕೆ ಅವರ ಬೆನ್ನಿಗೆ ನಿಂತಿತು. ಗಾಂಧಿಯ ಪ್ರತಿ ಹೆಜ್ಜೆಯನ್ನೂ ಅನುಸರಿಸಿ ಅವರು ಹೊತ್ತಿಸಿದ ಕಿಡಿಯನ್ನು ದೇಶದ ತುಂಬೆಲ್ಲ ಪಸರಿಸಿತು. 1885ರಲ್ಲಿ ಭಾರತೀಯ ರಾಷ್ಟ್ರೀಯ ಕಾಂಗ್ರೆಸ್ ಸ್ಥಾಪನೆಯಾದಾಗ ಅದನ್ನು ಅದ್ಧೂರಿಯಾಗಿ ಸ್ವಾಗತಿಸಿತು.

ಸ್ವರಾಜ್ಯ ಹೋರಾಟದ ಪ್ರತಿಯೊಂದು ಘಟನೆಗಳು ತಪ್ಪದೇ ವರದಿಯಾದವು. ದಂಡಿ ಉಪ್ಪಿನ ಸತ್ಯಾಗ್ರಹವನ್ನೇ ತೆಗೆದುಕೊಂಡರೆ, ಮಹಾತ್ಮ ಗಾಂಧಿ ದಂಡಿ ತಲುಪಿ ಕೈನಲ್ಲಿ ಉಪ್ಪಿನಂಶ ಒಳಗೊಂಡಿದ್ದ ಮಣ್ಣನ್ನು ವಿರೋಧದ ಪ್ರತಿರೂಪವಾಗಿ ಕೈಯಲ್ಲೆತ್ತಿ ಸಾಂಕೇತಿಕವಾಗಿ ತೋರಿದ ಕ್ಷಣದಿಂದಲೇ ಸವಿಸ್ತಾರ ವರದಿಗಳು ಪತ್ರಿಕೆಯಲ್ಲಿ ಪಡಿಮೂಡಿದವು.

1931ರಲ್ಲಿ ಭಗತ್ ಸಿಂಗ್, ರಾಜಗುರು ಹಾಗೂ ಸುಖದೇವ್ ಅವರ ಕೆಚ್ಚೆದೆಯ ಸಂಗ್ರಾಮ ಪತ್ರಿಕೆಯ ಪುಟಗಳಲ್ಲಿ ಬಣ್ಣನೆಯಾದವು. ಅವರ ವಿರುದ್ಧ ನಡೆದ ವಿಚಾರಣೆಯಂತೂ ದಿನಂಪ್ರತಿ ವರದಿಯಾಯಿತು. ಭಗತ್ ಸಿಂಗ್ ಕ್ಷಮಾದಾನಕ್ಕೆ ಮನವಿ ಮಾಡದಿದ್ದುದು, ತನ್ನನ್ನು ನೇಣಿಗೇರಿಸುವ ಬದಲು ಗುಂಡಿಕ್ಕಿ ಕೊಲ್ಲುವಂತೆ ಕೇಳಿದಾಗ ನ್ಯಾಯಾಧೀಶರು ಆ ಧೀರನ ನಡೆಯಿಂದ ಅಚ್ಚರಿಗೊಂಡಿದ್ದು ಮುಂತಾದ ಸಂಗತಿಗಳನ್ನು ಪತ್ರಿಕೆ ಭಾರತದ ಮನೆ ಮನೆ ತಲುಪಿಸಿತು.

ನವೆಂಬರ್ 3ಕ್ಕೆ 175 ವರ್ಷಗಳ ತನ್ನ ಸಾರ್ಥಕ ಅಸ್ತಿತ್ವ ಆಚರಿಸಿಕೊಂಡ ಈ ಪತ್ರಿಕೆ ಪ್ರತಿ ಪುಟಗಳ ಮೂಲಕ ಮಾಡಿದ ಮೋಡಿ ಶ್ರೀಮಂತವಾದುದು; ಅಗಾಧವಾದುದು.

1947ರ ಆಗಸ್ಟ್ 15ರಂದು ಸ್ವರಾಜ್ಯ ಸ್ಥಾಪನೆಯಾದ ಸಂದರ್ಭದಲ್ಲಿ ''ಸ್ವತಂತ್ರ ಭಾರತದ ಹುಟ್ಟು, ಹೊಸ ಬದುಕಿಗೆ ಎಚ್ಚೆತ್ತ ದೇಶ,'' ಎಂಬ ತಲೆ ಬರಹ ನೀಡಿ 'ಟೈಮ್ಸ್ ಆಫ್ ಇಂಡಿಯಾ' ಸಂಭ್ರಮಿಸಿತು. ಬ್ರಿಟಿಷರು ತೊಲಗಿದರು ಎಂದು ಮುಖಪುಟದಲ್ಲಿ ಬರೆದು ಭಾರತೀಯರ ಆಕ್ರೋಶಕ್ಕೆ ಮೂರ್ತರೂಪ ನೀಡಿತು. 1948ರ ಜನವರಿ 31ರಂದು ಮಹಾತ್ಮ ಹತ್ಯೆಯಾದ ದಿನ ದೇಶವಾಸಿಗಳ ಜತೆ ಸೇರಿ ಕಣ್ಣೀರುಗರೆಯಿತು.

ತರುವಾಯ ಹೊಸ ಸಂವಿಧಾನದ ಅಳವಡಿಕೆ, ರಾಜ್ಯಗಳ ಮರು ವಿಂಗಡಣೆ, ಏಕೀಕರಣ, ಪಂಚವಾರ್ಷಿಕ ಯೋಜನೆ, ಹಸಿರು ಕ್ರಾಂತಿ, ಆಹಾರ ಸ್ವಾವಲಂಬನೆ ಮುಂತಾದ ಅನೇಕ ದೃಢ ಹೆಜ್ಜೆಗಳಿಗೂ ಟೈಮ್ಸ್ ಆಫ್ ಇಂಡಿಯಾ ಸಾಕ್ಷಿಯಾಯಿತು. ಚೀನಾದೊಂದಿಗಿನ ಯುದ್ಧದ ಪರಾಭವ ಸೇರಿದಂತೆ ನೋವಿನ ಸಂಗತಿಗಳನ್ನೂ ಸಾಕ್ಷೀಕರಿಸಿತು. ಸೋಲಿನ ಸುತ್ತ ಹಬ್ಬಿ ನಿಂತ ವಿವಾದಗಳು, ನಮ್ಮ ಧೀರ ಯೋಧರಿಗೆ ಒದಗಿದ ಹೀನಾಯ ಪರಿಸ್ಥಿತಿಗಳು ಮತ್ತು ಜಗತ್ತಿನೆದುರು ಭಾರತ ತಲೆ ತಗ್ಗಿಸಿ ನಿಲ್ಲಲು ಕಾರಣವಾದ ನೀತಿ ನಿರೂಪಕರ ಮಹಾ ಪ್ರಮಾದಗಳನ್ನು ವರದಿ ಮಾಡಲು ಪತ್ರಿಕೆ ಹಿಂಜರಿಯಲಿಲ್ಲ.

1971ರಲ್ಲಿ ಬಾಂಗ್ಲಾದೇಶ ಜನ್ಮ ತಾಳಿದಾಗ ಭಾರತೀಯ ಸೇನೆ ಢಾಕಾದಲ್ಲಿ ದಿಗ್ವಿಜಯದ ಮೆರವಣಿಗೆ ನಡೆಸಿದ್ದನ್ನು ಟೈಮ್ಸ್ ಆಫ್ ಇಂಡಿಯಾ ದೊಡ್ಡ ದೊಡ್ಡ ಅಕ್ಷರಗಳಲ್ಲಿ ಬರೆಯಿತು. ಪರಾಜಿತ ಲೆಫ್ಟಿನೆಂಟ್ ಜನರಲ್ ಎ.ಎ.ಕೆ.ನಿಯಾಜಿ ತಮ್ಮ ರಿವಾಲ್ವರ್‌ನ ಗುಂಡುಗಳನ್ನು ಹೊರ ತೆಗೆದು ಜನರಲ್ ಜಗಜಿತ್ ಸಿಂಗ್ ಅರೋರಾ ಕೈಗಿಟ್ಟಿದ್ದನ್ನು ಎದೆಯುಬ್ಬಿಸಿ ಓದಿಸಿತು. ಎಲ್ಲೆ ಮೀರಿದ ಸಂಭ್ರಮದಲ್ಲಿ ಬಂಗಾಳಿಯರು ಭಾರತೀಯರನ್ನು ಅಪ್ಪಿ ಮುದ್ದಾಡಿದ ಪುಳಕವನ್ನು ಸದೃಶ ನೀಡಿ ಓದುಗರಲ್ಲಿ ರೋಮಾಂಚನ ಸೃಷ್ಟಿಸಿತು.

ದೇಶದ ಮೇಲೆ ಹೇರಿಕೆಯಾದ ತುರ್ತು ಪರಿಸ್ಥಿತಿ, ಪತ್ರಿಕಾ ಸ್ವಾತಂತ್ರ್ಯದ ಹರಣ ಮುಂತಾದ ಕಹಿ ಘಟನೆಗಳನ್ನೂ ಪತ್ರಿಕೆ ಅರಗಿಸಿಕೊಂಡು ಕುಗ್ಗದೆ ನಡೆಯಿತು. ಕಾಂಗ್ರೆಸ್ ಸರಕಾರ ಹಾಗೂ ಜನತಾ ಪ್ರಯೋಗಗಳ ಪತನಕ್ಕೆ ಭೂತಗನ್ನಡಿ ಹಿಡಿಯಿತು. ಬಾಬ್ರಿ ಮಸೀದಿ ಧ್ವಂಸ, 9/11ರ ದಾಳಿ, 26/11ರ ಮುಂಬಯಿ ಮಾರಣಹೋಮ ಮುಂತಾದ ಬರ್ಬರತೆಗೆ ಮಿಡಿಯಿತು.

ಪತ್ರಿಕೆಯ ಈ ಸುದೀರ್ಘ ಪಯಣದಲ್ಲಿ 1983 ಹಾಗೂ 2011ರಲ್ಲಿ ಭಾರತ ಕ್ರಿಕೆಟ್ ವಿಶ್ವಕಪ್ ಗೆದ್ದು ಬೀಗಿದ್ದು, ವಿಜ್ಞಾನ ಕ್ಷೇತ್ರದಲ್ಲಿ ದೇಶದ ಮುನ್ನಡೆ, ಅಮರ್ತ್ಯ ಸೇನ್ ಹಾಗೂ ಮದರ್ ಥೆರೆಸಾ ಅವರಿಗೆ ನೊಬೆಲ್ ದಕ್ಕಿದ್ದು ಮುಂತಾದ ಅಪ್ಪಟ ಸಂತಸದ ಘಳಿಗೆಗಳೂ ಜನಮಾನಸದಲ್ಲಿ ಪ್ರತಿಫಲಿಸಿದವು.

ಇಂದು, ಟೈಮ್ಸ್ ಆಫ್ ಇಂಡಿಯಾ  ಬಹು ಮಾಧ್ಯಮ ಸಂಸ್ಥೆಯಾಗಿ ಹೊರಹೊಮ್ಮಿದೆ. ಆರ್ಥಿಕ ಉದಾರೀಕರಣ, ಮುಕ್ತ ಮಾರುಕಟ್ಟೆ ಹಾಗೂ ಜಾಗತಿಕ ಸ್ಥಿತಿಗತಿಗಳ ಅನುಸರಣೆಯೊಂದಿಗೆ ಸಮ್ಮಿಳಿತಗೊಂಡು ಅಗ್ರ ಪಂಕ್ತಿಯಲ್ಲಿ ಸಾಗಿದೆ. ಟೈಮ್ಸ್ ಆಫ್ ಇಂಡಿಯಾದ ಅಂತರ್ಜಾಲ ಪ್ರಕಟಣೆ ಇಂದು ದೇಶದ ಅತ್ಯಂತ ಜನಪ್ರಿಯ ವೆಬ್‌ಸೈಟ್ ಪಟ್ಟ ಗಳಿಸಿಕೊಂಡಿದೆ. ಮೊಬೈಲ್ ಮೂಲಕವೂ ಪತ್ರಿಕೆ ಲಭ್ಯವಾಗುತ್ತಿದೆ. 2013ರ ಜನವರಿಯಲ್ಲಿ ಪತ್ರಿಕೆಯ 50 ಕೋಟಿ ಪುಟಗಳನ್ನು ಓದುಗರು ಸವಿದಿದ್ದಾರೆ. ಇಂದು ಟೈಮ್ಸ್ ಆಫ್ ಇಂಡಿಯಾ  ಮುದ್ರಣ, ಆನ್‌ಲೈನ್ ಮತ್ತು ಮೊಬೈಲ್ ಪ್ರಕಟಣೆಗಳ ಮೂಲಕ ದೇಶಿಯ ಹಾಗೂ ಜಾಗತಿಕವಾಗಿ ಸುಮಾರು 4.6 ಕೋಟಿ ಓದುಗರನ್ನು ತನ್ನವರನ್ನಾಗಿಸಿಕೊಂಡಿದೆ. ಭಾರತದ ಅತ್ಯಂತ ದೊಡ್ಡ ಮಾಧ್ಯಮ ಸಂಸ್ಥೆ 'ಬೆನೆಟ್, ಕೋಲ್‌ಮನ್ ಆಂಡ್ ಕಂಪನಿ ಲಿಮಿಟೆಡ್'ನ ಮುಕುಟಪ್ರಾಯವಾದ ಪತ್ರಿಕೆ ಈ 175 ವರ್ಷಗಳಲ್ಲಿ ಭಾರತ ಉಪಖಂಡದ ಬದುಕು ಹಾಗೂ ಕಾಲಕ್ಕೆ ಅಗಣಿತ ಕೊಡುಗೆ ನೀಡಿದೆ. ಭಾರತವು ಸ್ವತಂತ್ರವಾಗಬೇಕೆಂಬ ಪರಿಕಲ್ಪನೆ ಮೂಡುವುದಕ್ಕೆ ಮುಂಚಿನ ದಿನಗಳಿಂದಲೂ ಪ್ರತಿಯೊಂದು ಪ್ರಮುಖ ಘಟ್ಟಗಳನ್ನು ದಾಖಲಿಸುವ ಮೂಲಕ ಭಾರತದ ಸವಿಸ್ತಾರ ಚರಿತ್ರೆ ರೂಪುಗೊಳ್ಳಲು ನೆರವಾಗಿದೆ. ಎಲ್ಲಕ್ಕಿಂತ ಮುಖ್ಯವಾಗಿ ಕೋಟ್ಯಂತರ ಓದುಗರಿಗೆ ಸುದ್ದಿ ಹಾಗೂ ಮಾಹಿತಿ ನೀಡಿ ಅವರನ್ನು ಸಬಲರನ್ನಾಗಿ, ಆತ್ಮ ವಿಶ್ವಾಸಿಗಳನ್ನಾಗಿ ಮಾಡುವ ಧ್ಯೇಯದಿಂದಲೇ ಪ್ರತಿ ಹೆಜ್ಜೆಯನ್ನೂ ಇರಿಸಿದೆ.

ಅತ್ಯಾಧುನಿಕ ಡಿಜಿಟಲ್ ತಂತ್ರಜ್ಞಾನದೊಂದಿಗೆ ಸಮನ್ವಿತಗೊಂಡಿರುವ ಪತ್ರಿಕೆ ಭಾರತದ ಮುಂದುವರೆದ ಹೆಜ್ಜೆಗಳೊಂದಿಗೆ  ದಿಟ್ಟವಾಗಿ  ಹೆಜ್ಜೆಯನ್ನಿಡುತ್ತ ಸಾಗಿದೆ.


(ಇತ್ತೀಚೆಗೆ ವಿಜಯಕರ್ನಾಟಕದಲ್ಲಿ ಮೂಡಿಬಂದಿರುವ ಲೇಖನವನ್ನು ಕಿರು ಬದಲಾವಣೆಗಳೊಂದಿಗೆ ಮೂಡಿಸಿದ್ದೇನೆ).

Tag: Times of India

ಕಾಮೆಂಟ್‌ಗಳಿಲ್ಲ: