ಸೋಮವಾರ, ನವೆಂಬರ್ 4, 2013

ವಿರಾಟ್ ಕೊಹ್ಲಿ

ವಿರಾಟ್ ಕೊಹ್ಲಿ


ವಿರಾಟ್ ಕೊಹ್ಲಿ



ಇಂದಿನ ಕ್ರಿಕೆಟ್ ಯುಗದ ಶ್ರೇಷ್ಠ ಬ್ಯಾಟುದಾರರಲ್ಲಿ ಒಬ್ಬರೂ, ಭಾರತ ತಂಡದ ನಾಯಕರೂ ಆದ ವಿರಾಟ್ ಕೊಹ್ಲಿ ಅವರ ಜನ್ಮದಿನ.


ನವೆಂಬರ್ 5, 1988ರಲ್ಲಿ ದೆಹಲಿಯಲ್ಲಿ ಜನಿಸಿದ ವಿರಾಟ್ ಕೊಹ್ಲಿ 2008ರ ವರ್ಷದಲ್ಲಿ 19ವರ್ಷಕ್ಕಿಂತ ಕಿರಿಯರ ವಿಶ್ವಕಪ್ ಪ್ರಶಸ್ತಿ ಗೆದ್ದ ತಂಡದ ನಾಯಕತ್ವ ನಿರ್ವಹಿಸಿ, ಮರುವರ್ಷದಲ್ಲೇ ಒಂದು ದಿನದ ಅಂತರರಾಷ್ಟ್ರೀಯ ಕ್ರಿಕೆಟ್ ಪ್ರವೇಶಿಸಿದರು. ಮುಂದೆ ಟೆಸ್ಟ್ ಕ್ರಿಕೆಟ್ ಕೂಡಾ ಪ್ರವೇಶಿಸಿದ ಅವರು ಎಲ್ಲ ರೀತಿಯ ಕ್ರಿಕೆಟ್ನಲ್ಲೂ ತಮ್ಮ ವಿರಾಟ್ ಬ್ಯಾಟಿಂಗ್ ಶ್ರೇಷ್ಠತೆಯನ್ನು ಮೆರೆದಿದ್ದಾರೆ. ಕೆಲವೇ ವರ್ಷಗಳ ಹಿಂದೆ ಸಚಿನ್ ತೆಂಡೂಲ್ಕರ್ ಅವರಂತೆ ಮತ್ತೊಬ್ಬ ದಾಖಲೆ ಸಾಧ್ಯವೇ ಎಂದು ಪ್ರಶ್ನಿಸುತ್ತಿದ್ದ ವಿಶ್ವಕ್ಕೆ ವಿರಾಟ್ ಕೊಹ್ಲಿ ಮತ್ತೊಂದು ಭಾರತೀಯ ಉತ್ತರವಾಗಿದ್ದಾರೆ. ವಿಶ್ವದ ಶ್ರೇಷ್ಠ ಕ್ರಿಕೆಟಿಗರಲ್ಲಿ ಒಬ್ಬರಾದ ಆಸ್ಟ್ರೇಲಿಯಾದ ಸ್ಟೀವ್ ವಾ ಅವರು 'ವಿರಾಟ್ ಕೊಹ್ಲಿ' ಡಾನ್ ಬ್ರಾಡ್ಮನ್ ಅವರ (99.94) ರನ್ ಸರಾಸರಿ ದಾಖಲೆ ಹೊರತು ಪಡಿಸಿದಂತೆ ಉಳಿದೆಲ್ಲ ದಾಖಲೆಗಳನ್ನೂ ಮೀರುವ ಅಪರಿಮಿತ ಶಕ್ತಿವಂತ ಎಂದು ಶ್ಲಾಘಿಸಿದ್ದಾರೆ.


ಒಂದು ದಿನದ ಅಂತರರಾಷ್ಟ್ರೀಯ ಪಂದ್ಯಗಳಲ್ಲಿ ಅತ್ಯಂತ ಶೀಘ್ರವಾಗಿ ಕೇವಲ 205 ಪಂದ್ಯಗಳಲ್ಲಿ 10000 ರನ್ ಪೂರೈಸಿದ ಕೀರ್ತಿಯ ವಿರಾಟ್ ಕೊಹ್ಲಿ ಒಂದಾದ ನಂತರ ಮತ್ತೊಂದು ದಾಖಲೆಗಳನ್ನು ಪೋಣಿಸುತ್ತಲೇ ಸಾಗಿದ್ದಾರೆ.


ಹಲವಾರು ವರ್ಷಗಳಲ್ಲಿ ಐ.ಸಿ.ಸಿ ಒಂದು ದಿನದ ಪಂದ್ಯಗಳ ಶ್ರೇಷ್ಠ, ಅರ್ಜುನ ಪ್ರಶಸ್ತಿ, ಪದ್ಮಶ್ರೀ ಪ್ರಶಸ್ತಿ ಮುಂತಾದ ಅನೇಕ ಗೌರವಗಳು ಅವರಿಗೆ ಸಂದಿವೆ.


ಇನ್ನೂ ಕಿರಿಯ ವಯಸ್ಸಿನಲ್ಲೇ 82 ಟೆಸ್ಟ್ ಪಂದ್ಯಗಳಲ್ಲಿ 26 ಶತಕಗಳೊಡನೆ 7066 ರನ್ಗಳು, 239 ಒಂದು ದಿನದ ಅಂತರರಾಷ್ಟ್ರೀಯ ಪಂದ್ಯಗಳಲ್ಲಿ 43 ಶತಕಗಳೊಡನೆ 11,520 ರನ್ಗಳು ಹಾಗೂ ಇಪ್ಪತ್ತು ಓವರುಗಳ ಪಂದ್ಯಾವಳಿಗಳಲ್ಲಿ 71 ಪಂದ್ಯಗಳಲ್ಲಿ 2441 ರನ್ಗಳನ್ನು ಸಾಧಿಸಿದ ಈ ಹುಡುಗನ ವಿರಾಟ್ ಸಾಮರ್ಥ್ಯ ಅಚ್ಚರಿ ಹುಟ್ಟಿಸುವಂತದ್ದು. ಜೊತೆಗೆ ಬೆಂಗಳೂರಿನ ರಾಯಲ್ ಚಾಲೆಂಜರ್ಸ್ ನೇತೃತ್ವದ ಐ.ಪಿ.ಎಲ್ ಪಂದ್ಯಗಳು ಬೇರೆ.


ದಿನ ಬೆಳಗಾದರೆ ವಿಶ್ವದೆಲ್ಲೆಡೆ ಕ್ರಿಕೆಟ್, ಬೆಂಬಿಡದೆ ಕಾಡುವ ಮಾಧ್ಯಮ ಮತ್ತು ಪ್ರಸಿದ್ಧಿ, ನಾಯಕತ್ವದ ಒತ್ತಡ ಇವುಗಳಿಂದ ಬಸವಳಿಯದೆ ಈ ಹುಡುಗ ಇನ್ನೂ ಅನೇಕ ವರ್ಷಗಳ ವರೆವಿಗೆ ಉತ್ತಮ ಸಾಧನೆ ಮಾಡುತ್ತಿರಲಿ ಮತ್ತು ಸಂತೋಷವಾಗಿರಲಿ ಎಂದು ಶುಭ ಹಾರೈಸೋಣ.


Tag: Virat Kohli

Tag: Virat Kohli

ಕಾಮೆಂಟ್‌ಗಳಿಲ್ಲ: