ದೀಪಾ
ದೀಪಾ
ಇಂದು ಬಹುಮುಖಿ ಪ್ರತಿಭಾವಂತ ಕಲಾವಿದೆ ಮತ್ತು ಆತ್ಮೀಯರಾದ ದೀಪಾ ಅವರ ಹುಟ್ಟುಹಬ್ಬ.
ಪ್ರಸಿದ್ಧ ನಿರ್ದೇಶಕ ಟಿ.ಎನ್. ಸೀತಾರಾಮ್ ಅವರ ಧಾರಾವಾಹಿ 'ಮಗಳು ಜಾನಕಿ' ಮತ್ತು 'ಮತ್ತೆ ಮಾಯಾಮೃಗ' ಧಾರಾವಾಹಿಗಳ ಪಾತ್ರಗಳೂ ಸೇರಿದಂತೆ ದೀಪಾ ಎಲ್ಲರ ಮನೆ ಮಾತಾಗಿದ್ದಾರೆ. ಜೊತೆಗೆ, ಅವರು ಕಿರುವಯಸ್ಸಿನಿಂದಲೇ ರಂಗಭೂಮಿಯಲ್ಲಿ ಸುಮಾರು ಎರಡೂವರೆ ದಶಕಗಳ ಕಲಾಕೈಂಕರ್ಯ ನಡೆಸಿದವರು ಎಂಬುದು ಕೂಡಾ ಅಚ್ಚರಿ ಮೆಚ್ಚುಗೆಗಳೆರಡನ್ನೂ ತರುವಂತಹ ವಿಷಯವಾಗಿದೆ.
ಸಂಪ್ರದಾಯಸ್ತ ಕುಟುಂಬದ ಹಿನ್ನೆಲೆಯ ನಾಗರಾಜ ಶಾಸ್ತ್ರೀ ಮತ್ತು ಅನ್ನಪೂರ್ಣ ದಂಪತಿಗಳ ಪುತ್ರಿಯಾದ ದೀಪಾ ತಮ್ಮ 14 ನೇ ವಯಸ್ಸಿನಲ್ಲಿಯೇ ಸಂಗೀತ ಮತ್ತು ಭರತ ನಾಟ್ಯದ ಪರೀಕ್ಷೆಗಳನ್ನು ಮುಗಿಸಿ ಅಶೋಕ್ ನಿಟ್ಟೂರು ಅವರು ನಡೆಸುತ್ತಿದ್ದ ಬೇಸಿಗೆ ಅಭಿನಯ ತರಬೇತಿ ಶಿಬಿರದಲ್ಲಿ ಭಾಗವಹಿಸಿ ಅಭಿನಯ ಕ್ಷೇತ್ರಕ್ಕೆ ಕಾಲಿಟ್ಟವರು.
ಪ್ರಾರಂಭದಲ್ಲೇ ದೀಪಾ ಅವರು ದೂರದರ್ಶನದಲ್ಲಿ ಪ್ರಸಾರವಾಗುತ್ತಿದ್ದ "ಜನನಿ" ಧಾರಾವಾಹಿಯಲ್ಲಿ ಮೇರು ನಟಿ ಶ್ರೀಮತಿ ಭಾರತಿ ವಿಷ್ಣುವರ್ಧನ್ ಅವರೊಂದಿಗೆ ಅಭಿನಯಿಸಿ ಗಮನ ಸೆಳೆದರು. ಮುಂದೆ ದೂರದರ್ಶನದಲ್ಲಿ ದೀಪಾ ಅವರು ನಡೆಸಿಕೊಡುತ್ತಿದ್ದ "ಆಚಾರ ವಿಚಾರ" ಎಂಬ ಕಾರ್ಯಕ್ರಮ ನೂರಾರು ಸಂಚಿಕೆಗಳನ್ನು ಪೂರೈಸಿತ್ತು.
ರಂಗಭೂಮಿ ಮತ್ತು ಕಿರುತೆರೆಗಳಲ್ಲಿ ತಮ್ಮ ನಿರಂತರ ಸಕ್ರಿಯ ಆಸಕ್ತಿ ಮತ್ತು ನಂಟನ್ನು ನಿರಂತರ ತಮ್ಮ ಜೊತೆ ಇರಿಸಿಕೊಂಡಿರುವ ದೀಪಾ ಅವರ ಮತ್ತೊಂದು ಪ್ರಮುಖ ಸಾಧನೆಯೆಂದರೆ, ಅವರು ಬೆಂಗಳೂರಿನ ಕೆಂಗೇರಿಯಲ್ಲಿ ತಮ್ಮದೇ ಸಂಸ್ಥೆ "ನವರಂಗ" ದಲ್ಲಿ ಮಕ್ಕಳಿಗೆ ಭರತನಾಟ್ಯ ಮತ್ತು ಸಂಗೀತದ ತರಬೇತಿ ನೀಡುತ್ತಿರುವುದು.
ಕಲಾತ್ಮಕ ಚಿತ್ರಗಳಲ್ಲಿ ವಸ್ತ್ರವಿನ್ಯಾಸ, ಕೆಲವು ಚಿತ್ರಗಳಲ್ಲಿ ಅಭಿನಯ ಮುಂತಾದವು ದೀಪಾ ಅವರ ಕುರಿತು ನಾವು ಅಲ್ಲಲ್ಲಿ ಓದಿರುವ ಇನ್ನಿತರ ವಿಚಾರಗಳು. ಅವರು ಹಲವು ಆತ್ಮೀಯರೊಂದಿಗೆ ಸೇರಿ ಮೊಬೈಲ್ ವಿಡಿಯೋ ಬಳಸಿಯೇ ಅಚ್ಚುಕಟ್ಟಾಗಿ ಕಿರುಚಿತ್ರಗಳನ್ನು ಮೂಡಿಸಿದ್ದಾರೆ. ಪ್ರಸಿದ್ಧ ದಾಸ-ಪುರಂದರ ಸೇರಿದಂತೆ ಅವರು ನಮಗೆ ಕಂಡಿರುವ ಧಾರಾವಾಹಿಗಳು ಅನೇಕ.
ಸದಾ ಕ್ರಿಯಾಶೀಲರಾಗಿ ನಮ್ರ ಹಸನ್ಮುಖದೊಂದಿಗೆ ಬೆರೆಯುವ ದೀಪಾ ಅವರ ಪರಿಚಯ ದೊರೆತದ್ದು ನನ್ನ ಸೌಭಾಗ್ಯದಲ್ಲಿ ಕೂಡಾ ಸೇರಿದೆ. ಈ ನಿರಂತರ ನಗೆಮೊಗದ ಕಾಂತಿಯುಕ್ತ ದೀಪ ಅನುದಿನ ಪ್ರಕಾಶಿಸುತ್ತಿರಲಿ ಎಂಬುದು ನಮ್ಮೆಲ್ಲರ ಆತ್ಮೀಯ ಹಾರೈಕೆ.
On the birth day of multi talented artiste and our affectionate friend Deepa KN
ಕಾಮೆಂಟ್‌ಗಳು