ಮಂಗಳವಾರ, ಸೆಪ್ಟೆಂಬರ್ 3, 2013

ಒಡಲೆಂಬ ಗುಡಿಯೊಳಗೆ



ಒಡಲೆಂಬ ಗುಡಿಯೊಳಗೆ ಒಡೆಯನೆನ್ನವನಿಹನು
ನಡೆಯುವೆನು ನಡೆಸಿದಂತವನು ಕೈ ಬಿಡನು
ಬಡವ ತಬ್ಬಲಿ  ಎಂದು  ಚಡಪಡಿಸದಿರು ನೀನು
ಕೊಡುವಾತ ಬಿಡುವಾತ ನನ್ನ ಒಳಗಿಹನು

ನಾನೇ ಆಡಿದ ನನ್ನ ಕೋಡಂಗಿ ಆಟವನು,
ನೋಡಿ ಕೈ ಪರೆಗುದ್ದಿ ನಕ್ಕವನು ಅವನು.
ನನ್ನ ಹಿಂದೆಯೇ ಇದ್ದು ನಾ ಬಿದ್ದೆ ಎಂದಾಗ
ಬಂದೆತ್ತಿ ಕಣ್ಣೊರಸಿ ನಗಿಸಿದವನವನು

ನನ್ನೊಡಲೊಲಿರ್ಪಾತ ನಾ ತಾನೇ ಸದಾಶಿವನು
ಕ್ಷೇಮಕಾರಕ ಮೂರ್ತಿ ನನಗೆಂದೂ ಅವನು
ನನ್ನ ಜೀವನ ರಥದ ವಿಜಯದ ಮಹೋತ್ಸವಕೆ
ತಾನೇ ಸಾರಥಿಯಾಗಿ ನಡೆಸುವನು ಜಯಕೆ 

ಒಡಲೆಂಬ ಗುಡಿಯೊಳಗೆ ಒಡೆಯನೆನ್ನವನಿಹನು
ನಡೆಯುವೆನು ನಡೆಸಿದಂತವನು ಕೈ ಬಿಡನು

ಸಾಹಿತ್ಯ:  ಎಸ್.ವಿ. ಪರಮೇಶ್ವರ ಭಟ್ಟ


Tag: Odalemba Gudiyolage

ಕಾಮೆಂಟ್‌ಗಳಿಲ್ಲ: