ಬಾರೋ ಮನೆಗೆ ಗೋವಿಂದ ನಿನ್ನಂಘ್ರಿ ಕಮಲವ
ತೋರೋ ಎನಗೆ ಮುಕುಂದ ನಲಿದಾಡು ಮನದಲಿ
ಮಾರಪಿತನೆ ಆನಂದ ನಂದನ್ನ ಕಂದ

ಚಾರುತರ ಶರೀರ ಕರುಣಾ
ವಾರಿನಿಧಿ ಭವಘೋರನಾಶನ
ವಾರಿಜಾಸನವಂದ್ಯ ನೀರಜ
ಸಾರಸದ್ಗುಣ ಹೇ ರಮಾಪತಿ

ನೋಡು ದಯದಿಂದೆನ್ನ ಕರಪದುಮ ಶಿರದಲಿ
ನೀಡು ಭಕ್ತಪ್ರಸನ್ನ ನಲಿದಾಡು ಮನದಲಿ
ಬೇಡಿಕೊಂಬೆನೊ ನಿನ್ನ ಆನಂದಘನ್ನ
ಮಾಡದಿರು ಅನುಮಾನವನು ಕೊಂ-
ಡಾಡುವೆನು ತವ ಮಹಿಮೆಗಳನು
ಜೋಡಿಸುವೆನು ಕರಗಳನು ಚರಣಕೆ
ಕೂಡಿಸೋ ತವ ದಾಸಜನರೊಳು
ಬಾರೋಮನೆಗೆ . . .

ಹೇಸಿ ವಿಷಯಗಳಲ್ಲೀ ತೊಳಲಾಡಿ ನಾ ಬಲು
ಕ್ಲೇಶ ಪಡುವುದ ಬಲ್ಲೀ ಧನಯುವತಿಗಳ ಸುಖ
ಲೇಸು ಎಂಬುದನು ಕೊಲ್ಲಿ ಆಸೆ ಬಿಡಿಸಿಲ್ಲಿ
ಏಸುಜನುಮದ ದೋಷದಿಂದಲಿ
ಈಸುವೆನು ಇದರೊಳಗೆ ಇಂದಿಗೆ
ಮೋಸವಾಯಿತು ಆದುದಾಗಲಿ
ಶ್ರೀಶ ನೀ ಕೈ ಪಿಡಿದು ರಕ್ಷಿಸೋ 
ಬಾರೋಮನೆಗೆ . . .

ನೀನೆ ಗತಿ ಎನಗಿಂದು ಉದ್ಧರಿಸೊ ಬೇಗನೆ
ದೀನಜನರಿಗೆ ಬಂಧು ನಾ ನಿನ್ನ ಸೇವಕ
ಶ್ರೀನಿವಾಸನೆ ಎಂದೆಂದು ಕಾರುಣ್ಯಸಿಂಧೂ
ಪ್ರಾಣಪತಿ ಹೃದಯಾಬ್ಜಮಂಟಪ
ಸ್ಥಾನದೊಳಗಭಿವ್ಯಾಪ್ತ ಚಿನ್ಮಯ
ಧ್ಯಾನಗೋಚರನಾಗಿ ಕಣ್ಣಿಗೆ
ಕಾಣಿಸುತ ಶ್ರೀರಂಗವಿಠ್ಠಲ
ಬಾರೋಮನೆಗೆ . . .

Tag: Baaro manege govinda, baro manege govinda