ವಿಜಯ ಸಂಕೇಶ್ವರ
ವಿಜಯ ಸಂಕೇಶ್ವರ
ವಿಜಯ ಸಂಕೇಶ್ವರ ಕಷ್ಟಪಟ್ಟು ಮೇಲೆ ಬಂದು ಅಪಾರ ಸಾಧನೆ ಮಾಡಿರುವ ಉದ್ಯಮಿ.
ವಿಜಯ ಸಂಕೇಶ್ವರ 1950ರ ಆಗಸ್ಟ್ 2ರಂದು ಗದಗದ ಬೆಟಗೇರಿಯಲ್ಲಿ ಜನಿಸಿದರು. ತಂದೆ ಬಸವಣ್ಣೆಪ್ಪ. ತಾಯಿ ಚಂದ್ರಮ್ಮ. ತಂದೆ ಗದಗದಲ್ಲಿ ಬಿ.ಜಿ ಸಂಕೇಶ್ವರ ಪ್ರಿಂಟರ್ಸ್ ಎಂಬ ಮುದ್ರಣಾಲಯದ ಮಾಲೀಕರಾಗಿದ್ದರು. ವಿಜಯ ಸಂಕೇಶ್ವರ ಬಿ.ಕಾಂ. ಪದವೀಧರರಾದರು.
ವಿಜಯ ಸಂಕೇಶ್ವರ ಮೊದಲು ತಮ್ಮ ತಂದೆ ಮತ್ತು ಹಿರಿಯಣ್ಣನ ಜೊತೆ ಮುದ್ರಣಾಲಯದಲ್ಲಿ ಪ್ರೂಫ್ ರೀಡಿಂಗ್ ಹಾಗೂ ಮಾರುಕಟ್ಟೆ ಕೆಲಸವನ್ನ ಸ್ವಲ್ಪ ದಿನ ನೋಡಿಕೊಂಡರು. ತಾವೇ ಏನಾದರೂ ಮಾಡಬೇಕು ಎಂಬ ತುಡಿತ ಅವರಲ್ಲಿತ್ತು. ತಮ್ಮ 26ನೇ ವಯಸ್ಸಿನಲ್ಲಿ ಕೆಲವು ಹಣಕಾಸು ಸಂಸ್ಥೆಗಳಿಂದ ಸಾಲ ಪಡೆದು, ಒಂದು ಲಾರಿ ಕೊಂಡುಕೊಂಡರು. ಲಾರಿ ಚಾಲಕರಾಗಿದ್ದವರು ಮುಂದೆ ಅಪರಿಮಿತ ಸ್ವಯಂ ಪರಿಶ್ರಮ ಮತ್ತು ಚಾಕಚಕ್ಯತೆಗಳಿಂದ ದೇಶಾದ್ಯಂತ ಸುಮಾರು 3500ಕ್ಕೂ ಹೆಚ್ಚು ಲಾರಿಗಳ ಮತ್ತು 400ಕ್ಕೂ ಹೆಚ್ಚು ಬಸ್ಸುಗಳ ಮಾಲೀಕರಾದರು.
ವಿಜಯ ಸಂಕೇಶ್ವರ ಆರಂಭದಲ್ಲಿ ಗದಗ - ಹುಬ್ಬಳ್ಳಿ ನಡುವೆ ಕಿರಾಣಿ ಸಾಮಗ್ರಿ ಮತ್ತು ಇನ್ನಿತರ ಸಾಮಗ್ರಿಗಳನ್ನ ಸಾಗಿಸುತ್ತಿದ್ದರು. ಆಗಿನ ಕಾಲದ ಪ್ರತಿಷ್ಠಿತ ಸರಕು ಸಾಗಾಣಿಕಾ ಸಂಸ್ಥೆಗಳಿಂದ ತೀವ್ರ ಪ್ರತಿಸ್ಪರ್ಧೆ ಎದುರಿಸಿದರೂ ಎದೆಗುಂದದೆ ಪ್ರಗತಿ ಸಾಧಿಸಿದರು. 1983ರ ಮಾರ್ಚ್ 31ರಂದು ವಿಆರ್ಎಲ್ ಪ್ರೈವೇಟ್ ಲಿಮಿಟೆಡ್ ಎಂಬ ಸರಕು ಸಾಗಾಣಿಕಾ ಸಂಸ್ಥೆಯನ್ನ ಅಸ್ತಿತ್ವಕ್ಕೆ ತಂದರು. ಇದು 1994ರ ಜುಲೈ 1ರಂದು ಪಬ್ಲಿಕ್ ಲಿಮಿಟೆಡ್ ಸಂಸ್ಥೆಯಾಯ್ತು. ಸರಕು ಸಾಗಾಣಿಕೆಯಲ್ಲದೆ ಪ್ರಯಾಣಿಕರಿಗೆ ಸೇವೆಯನ್ನೂ ಯೋಜಿಸಿ ನಾಲ್ಕು ಬಸ್‍ಗಳ ಮೂಲಕ ಸೇವೆ ಆರಂಭಿಸಿದರು. ಆರಂಭದಲ್ಲಿ ಹುಬ್ಬಳ್ಳಿ - ಬೆಂಗಳೂರು ನಡುವೆ ಆರಂಭಗೊಂಡ ಈ ಸೇವೆ ವ್ಯಾಪಕಗೊಳ್ಳುತ್ತಾ ಸಾಗಿ ಅನೇಕ ಮಾರ್ಗಗಳ ಹಲವು ನೂರು ಬಸ್ಸುಗಳ ಉದ್ಯಮ ಸೇವೆಯಾಗಿ ಬೆಳೆದು ನಿಂತಿದೆ.
ವಿಜಯ ಸಂಕೇಶ್ವರ ಅವರು 'ವಿಜಯ ಕರ್ನಾಟಕ' ದಿನಪತ್ರಿಕೆಯನ್ನು ಮೂಡಿಸಿ ಆ ಪತ್ರಿಕೆಯನ್ನು ಚಲಾವಣೆಯಲ್ಲಿ ರಾಜ್ಯದ ಪ್ರಥಮ ಕನ್ನಡ ಪತ್ರಿಕೆಯಾಗಿ ಬೆಳೆಸಿದರು. 2007ರಲ್ಲಿ ಇದನ್ನು ಟೈಮ್ಸ್ ಗ್ರೂಪ್‍ಗೆ ಮಾರಾಟಮಾಡಿದರು. 5 ವರ್ಷದ ಸ್ಪರ್ರ್ಧಿಸುವಂತಿಲ್ಲ ಎಂಬ ಕರಾರು ಅವಧಿ ಮುಗಿದೊಡನೆಯೇ 'ವಿಜಯವಾಣಿ' ಪತ್ರಿಕೆ ಆರಂಭಿಸಿ ಅದರಲ್ಲೂ ವಿಜಯ ಸಾಧಿಸಿದರು. 2017ರಲ್ಲಿ 'ದಿಗ್ವಿಜಯ 24 x 7' ಎನ್ನುವ ಟಿವಿ ಚಾನೆಲ್ ಆರಂಭಿಸಿದರು.
ವಿಜಯ ಸಂಕೇಶ್ವರ ಅವರು ರಾಜಕೀಯಕ್ಕೂ ಬಂದು ಅಲ್ಲೂ ಸಾಕಷ್ಟು ಯಶಸ್ಸು ಗಳಿಸುವುದರ ಜೊತೆಗೆ ಸ್ವಲ್ಪ ಅಸಂತೃಪ್ತಿ - ಸಮಾಧಾನಗಳ ನಡುವೆ ಆ ಕ್ಷೇತ್ರದಲ್ಲೂ ಹುಟ್ಟುಹಾಕುತ್ತಿದ್ದಾರೆ.
ವಿಜಯ ಸಂಕೇಶ್ವರ ಅವರಿಗೆ ಪದ್ಮಶ್ರೀ ಪ್ರಶಸ್ತಿಯೂ ಸೇರಿದಂತೆ ಅನೇಕ ಗೌರವಗಳು ಸಂದಿವೆ. ಅವರ ಸಾಧನೆಯ ಬದುಕು ಚಲನಚಿತ್ರದಲ್ಲೂ ಮೂಡಿದೆ.
ಪರಿಶ್ರಮ, ಯಶಸ್ಸು, ಜನಮಿಡಿತ, ಜನಪ್ರಿಯತೆ ಹೀಗೆ ಪ್ರತಿನಿಟ್ಟಿನಲ್ಲಿ ವಿಜಯ - ದಿಗ್ವಿಜಯಗಳನ್ನು ಸಾಧಿಸಿರುವ ವಿಜಯ ಸಂಕೇಶ್ವರರು ನಾಡಿನ ಜನತೆಯ ಬದುಕಿಗೆ ಬೇಕಾದ ವಿಜಯಗಳ ರೂವಾರಿಯೂ ಆಗಲಿ ಎಂಬುದು ಅವರ ಮೆಚ್ಚುಗರ ಸದಾಶಯ.
On the birthday of Vijay Sankeshwar, a true synonym of success through hard work
ಕಾಮೆಂಟ್‌ಗಳು