ಮೆಹಮೂದ್ ಪ್ರಖ್ಯಾತ ನಟ, ಗಾಯಕ, ನಿರ್ದೇಶಕ ಮತ್ತು ನಿರ್ಮಾಪಕ.  ಹಿಂದಿ ಚಲನಚಿತ್ರಗಳಲ್ಲಿಹಾಸ್ಯ ಪಾತ್ರಗಳನ್ನು ನಿರ್ವಹಿಸುವಲ್ಲಿ ಹೆಸರುವಾಸಿಯಾಗಿದ್ದವರು. ನಾಲ್ಕು ದಶಕಗಳಿಗೂ ಹೆಚ್ಚುಕಾಲದ ವೃತ್ತಿಜೀವನದಲ್ಲಿ ಅವರು 300 ಕ್ಕೂ ಹೆಚ್ಚು ಚಲನಚಿತ್ರಗಳಲ್ಲಿ ಕೆಲಸ ಮಾಡಿದ್ದರು 

ಮೆಹಮೂದ್ ಅಲಿ 1932ರ ಸೆಪ್ಟೆಂಬರ್ 29ರಂದು ಜನಿಸಿದರು. 1940 ಮತ್ತು 1950ರದಶಕದಲ್ಲಿ ಚಿತ್ರರಂಗದ ದೊಡ್ಡ ತಾರೆಯಾಗಿದ್ದ ಲತೀಫುನ್ನಿಸಾ ಮತ್ತು ಚಲನಚಿತ್ರ ಹಾಗೂ ರಂಗಕಲಾವಿದ ಮುಮ್ತಾಜ್ ಅಲಿ ಅವರ ಪುತ್ರರಾದ ಮೆಹಮೂದ್‌ ಅವರಿಗೆ ಒಬ್ಬ ಅಕ್ಕ ಮತ್ತು ಆರುಮಂದಿ ಕಿರಿಯ ಸಹೋದರರಿದ್ದರು. ಅವರ ಸಹೋದರಿ ಮಿನೂ ಮುಮ್ತಾಜ್ ಬಾಲಿವುಡ್ಚಲನಚಿತ್ರಗಳಲ್ಲಿ ಯಶಸ್ವಿ ನಟಿಯಾಗಿ ನೃತ್ಯಗಳಿಗೆ ಹೆಸರಾಗಿದ್ದರು. ಅವರ ಕಿರಿಯ ಸಹೋದರಅನ್ವರ್ ಅಲಿ ಕೂಡ ನಟ ಮತ್ತು ನಿರ್ಮಾಪಕರಾಗಿದ್ದರು.

ಬಾಲ್ಯದಲ್ಲಿ, ಮೆಹಮೂದ್ 'ಕಿಸ್ಮತ್' ಅಂತಹ ಚಿತ್ರಗಳಲ್ಲಿ ಕೆಲಸ ಮಾಡಿದ್ದರು. ನಂತರ ಅವರುಹಲವಾರು ವೃತ್ತಿಗಳಲ್ಲಿ ದುಡಿದರು.  ಕೋಳಿ ಉತ್ಪನ್ನಗಳನ್ನು ಮಾರಾಟ ಮಾಡಿದರು.   ನಿರ್ದೇಶಕಪಿ.ಎಲ್. ಸಂತೋಷಿ ಅವರ ಚಾಲಕರಾಗಿ ಕೆಲಸ ಮಾಡಿದರು. ಮುಂದೆ 1994ರಲ್ಲಿ ಸಂತೋಷಿಅವರ ಮಗ ರಾಜ್‌ಕುಮಾರ್ ಸಂತೋಷಿ ಅವರ ಅಂದಾಜ್ ಅಪ್ನಾ ಅಪ್ನಾ ಚಿತ್ರದಲ್ಲಿ ನಟಿಸಿದರು.

ಮೆಹಮೂದ್ ಅವರು ನಟಿ ಮೀನಾ ಕುಮಾರಿ ಅವರಿಗೆ ಟೇಬಲ್ ಟೆನ್ನಿಸ್ ಕಲಿಸುತ್ತಿದ್ದರಂತೆ. ಮೆಹಮೂದ್ 1950ರ ದಶಕದ ಆರಂಭದಲ್ಲಿ ನಟಿ ಮೀನಾ ಕುಮಾರಿ ಅವರ ತಂಗಿ ಮಧುಅವರನ್ನು ವಿವಾಹವಾದರು.   C.I.D ಚಿತ್ರದಲ್ಲಿ ಪುಟ್ಟಪಾತ್ರದಲ್ಲಿ ಅಭಿನಯಿಸಿ ಮುಂದೆ ಹೆಚ್ಚುಹೆಚ್ಚು ಚಿತ್ರಗಳಲ್ಲಿ ನಟಿಸಿದರು.  ದೋ ಬಿಘಾ ಜಮೀನ್ ಮತ್ತು ಪ್ಯಾಸಾದಲ್ಲಿ ಕಡಲೆಕಾಯಿಮಾರಾಟಗಾರನಂತಹ ಚಿತ್ರಗಳಲ್ಲಿ ಸಣ್ಣ  ಪಾತ್ರಗಳನ್ನು ಮಾಡಿದ ಅವರಿಗೆ ಮುಂದೆ ಗಣನೀಯಮತ್ತು ಪ್ರಮುಖ ಪಾತ್ರಗಳು ಸಂದವು.   ಹಾಸ್ಯ ಪಾತ್ರಾಭಿನಯಕ್ಕೆ ಅವರು ಹೆಚ್ಚು ಮೆಚ್ಚುಗೆಪಡೆದರು.  

ಪರ್ವರಿಷ್, ಛೋಟಿ ಬಹೆನ್, ಸಸುರಾಲ್, ದಿಲ್ ತೇರಾ ದೀವಾನಾ, ಜಿದ್ದಿ, ಜಿಂದಗಿ, ಬೇಟಿ ಬೇಟೆ, ಗುಮ್ನಾಮ್, ಜೋಹರ್ - ಮೆಹಮೂದ್ ಇನ್ ಗೋವಾ, ಕಾಜಲ್, ನೀಲ್ ಆಕಾಶ್, ಬಹು ಬೇಟಿ, ಲವ್ ಇನ್ ಟೋಕಿಯೊ, ಪ್ಯಾರ್ ಕಿಯೆ ಜಾಯ್, ಪಥ್ಥರ್ ಕೆ ಸನಮ್, ಆಂಖೇನ್, ದೋ ಕಲಿಯಾನ್, ನೀಲ್ ಕಮಲ್, ಪಡೋಸನ್, ಇಜ್ಜತ್, ಸಾಧು ಔರ್ ಶೈತಾನ್, ವಾರಿಸ್, ಹಮ್ಜೋಲಿ, ಮೈ ಸುಂದರ್ ಹ್ಞೂ, ಪರಾಸ್, ಮೇರೇ ಅಪ್ನೇ, ನಯಾ ಜಮಾನಾ, ಪಾಕೆಟ್ ಮಾರ್, ಕುಂವಾರಾಬಾಪ್, ಖುದ್ದಾರ್ ಮುಂತಾದ ಅನೇಕ ಚಿತ್ರಗಳಲ್ಲಿ ಮೆಹಮೂದ್ ಅವರ ಅಭಿನಯ ಪ್ರಖ್ಯಾತಿಪಡೆದಿತ್ತು. 

ಅನೇಕ ಚಲನಚಿತ್ರಗಳ ಅಭಿನಯಕ್ಕೆ ಮೆಹಮೂದ್ ಅವರಿಗೆ ಫಿಲಂಫೇರ್ ಪ್ರಶಸ್ತಿ ಮತ್ತುನಾಮನಿರ್ದೇಶ ಗೌರವಗಳು ಸಂದಿದ್ದವು.

ಹಲವು ವರ್ಷಗಳ ಕಾಲ ಬೆಂಗಳೂರಿನ ನಿವಾಸಿಯಾಗಿದ್ದ ಮೆಹಮೂದ್ ಅವರು, ಅನಾರೋಗ್ಯದಕಾರಣ ಅಮೆರಿಕದಲ್ಲಿ ಚಿಕಿತ್ಸೆಗಾಗಿ ತೆರಳಿದ್ದಾಗ 2004ರ  ಜುಲೈ 23ರಂದು ನಿಧನರಾದರು.

On the birth anniversary of great comedian Mehmood