ಚೆಲುವಾಂಬೆ ಎಂಬ ಕವಯಿತ್ರಿಯು ಸು. 1725 ರಲ್ಲಿದ್ದವಳು. ಈಕೆ ಮೈಸೂರು ದೊರೆಯದ ದೊಡ್ಡ ಕೃಷ್ಣರಾಜನ ಮಹಿಷಿ. ದೊಡ್ಡ ಕೃಷ್ಣರಾಜನು ಕ್ರಿ. ಶ. 1713 - 1731 ರವರೆಗೆ ಆಳಿದ ದೊರೆ. ಚೆಲುವಾಂಬೆಯು ಮೈಸೂರಿನ ದಳವಾಯಿಯಾಗಿದ್ದ ದೊಡ್ಡೇಂದ್ರನ ಪುತ್ರ ಕಳಿಲೆ ಕಾಂತರಾಜನ ಪುತ್ರಿ. ವಿದ್ಯಾವತಿಯಾದ ಈಕೆಯು ತನ್ನ ಪತಿಯ ಆಶಯದಂತೆ *ವರನಂದೀ ಕಲ್ಯಾಣ* ಎಂಬ ಕಾವ್ಯವನ್ನು ರಚಿಸಿದ್ದಾಳೆ. ಈ ಗ್ರಂಥವು ತಿರುಪತಿ ವೇಂಕಟರಮಣದೇವರ ಅಂಕಿತದಲ್ಲಿ ಲಿಖಿತವಾಗಿದೆ. ಈ ಕಾವ್ಯವನ್ನು ಚೆಲುವಾಂಬೆಯು ಸಾಂಗತ್ಯದಲ್ಲಿ ಬರೆದಿದ್ದಾಳೆ. ಇದರಲ್ಲಿ ಒಟ್ಟು 881 ಪದ್ಯಗಳಿವೆ. ಇದರ ಕಥೆಯು ಡಿಳ್ಳಿ ಬಾದಶಾಹನ ಮಗಳಾದ ವರನಂದಿಗೂ ಮೇಲುಕೋಟೆ ಚೆಲುವರಾಯಸ್ವಾಮಿಗೂ ನಡೆದ ವಿವಾಹದ ವರ್ಣನೆಯನ್ನು ಒಳಗೊಂಡಿದೆ. ಈ ಕಾವ್ಯದಲ್ಲಿ ಸಾಕ್ಷಾತ್ ಸತ್ಯಭಾಮೆಯೇ ವರನಂದಿಯಾಗಿ ಹುಟ್ಟಿದಂತೆ ವರ್ಣಿತವಾಗಿದೆ. ವರನಂದಿಯನ್ನು ವರ್ಣಿಸಿದ ಪದ್ಯವೊಂದನ್ನು ಕೆಳಗೆ ನೀಡಲಾಗಿದೆ :

*ವರನಂದಿಯ ಸೌಂದರ್ಯ*

ನೋಡುವ ನೈದಿಲುಗಳೊ ಕಂಗಳೊ ಮಾ l 
ತಾಡುವ ಮುಕುರವೊ ಮೊಗವೋ l
ಪಾಡುತಿರುವ ಪೊಂಬಣ್ಣದ ಶಂಖವೊ l 
ಗಾಡಿಕಾತಿಯ ನುಣ್ಗೊರಲೋll
ನಡೆವೆಳಮಿಂಚೊ ಪೊಂಜೆಳೆಮಯ್ಯೊ ಬಿಡದುಸಿ | 

ರಿಡುವ ಸಂಪಗೆಯೊ ನಾಸಿಕವೋ | 

ಕಡುಸವಿಯೇಱೆ ಮಿಡುಕುತಿರ್ಪ ಪವಳವೊ | 

ಬೆಡಗಿಯ ಚೆಂಬಣ್ಣದುಟಿಯೊ ll 
ಮೊಗದಾವರೆಗಂಪ ಕೊಳಲೆಂದು ಬಂದು ಸಂ | 

ಪಗೆಯೆಂದು ಬಗೆದು ನಾಸಿಕವ l 
ಸುಗಿದು ಪೆಱಗೆ ನಿಂದ ತುಂಬಿವಿಂಡೆಂಬಂತೆ | 
ಬಗೆಗೆ ಬಂದುದು ಮುಡಿಯವಳ ll