ವಿದ್ವಾನ್ ಬೆಂಗಳೂರು ಕೆ. ವೆಂಕಟರಾಮ್ ಅವರು ಮಹಾನ್ ಘಟಂ ವಾದಕಾರರಾಗಿ ಮತ್ತು ಗುರುವಾಗಿ ಹೆಸರಾದವರು.  ಇಂದು ಅವರ ಸಂಸ್ಮರಣೆ ದಿನ. 

ವೆಂಕಟರಾಮ್ 1935ರ ಜನವರಿ 10 ರಂದು ಜನಿಸಿದರು. ಅವರು ವಿದ್ವಾನ್ ಕೆ. ಎಸ್. ಮಂಜುನಾಥ್ ಅವರಿಂದ ತರಬೇತಿ ಪಡೆದರು. ವೆಂಕಟರಾಮ್ ಅವರು ಪಿಟೀಲು ವಾದಕ ಅನೂರು ರಾಮಕೃಷ್ಣರನ್ನು ಸಹಾ ತಮ್ಮ ಗುರುವೆಂದು ಪರಿಗಣಿಸಿದ್ದರು.

1946 ರಲ್ಲಿ ಸಂಗೀತ ಕಚೇರಿಗಳಿಗೆ ಪಾದಾರ್ಪಣೆ ಮಾಡಿದ ವೆಂಕಟರಾಮ್ ಅವರು ಟಿ ಚೌಡಯ್ಯ, ಮೈಸೂರು ವಾಸುದೇವಾಚಾರ್ಯ, ಅರಿಯಕ್ಕುಡಿ ರಾಮಾನುಜ ಅಯ್ಯಂಗಾರ್, ಚೆಂಬೈ ವೈದ್ಯನಾಥ ಭಾಗವತರ್, ಮುಸಿರಿ ಸುಬ್ರಹ್ಮಣ್ಯ ಅಯ್ಯರ್, ಎಂ ಎಸ್ ಸುಬ್ಬುಲಕ್ಷ್ಮಿ, ಡಿ ಕೆ ಪಟ್ಟಮ್ಮಾಳ್, ಎಂ ಡಿ ರಾಮನಾಥನ್, ಲಾಲ್ಗುಡಿ ಜಯರಾಮನ್, ಉನ್ನಿಕೃಷ್ಣನ್, ಎಸ್ ಶಶಾಂಕ್, ಆರ್. ಕೆ. ಪದ್ಮನಾಭ  ಸೇರಿದಂತೆ ಮೂರು ತಲೆಮಾರಿನ ಬಹಳಷ್ಟು ಸಂಗೀತಕಾರರಿಗೆ ಪಕ್ಕವಾದ್ಯ ನುಡಿಸಿದ್ದರು.  ತಾಳವಾದ್ಯವು ಅವರ ಮೊದಲ ಭಾಷೆಯಾಗಿತ್ತು. ಅವರ ಕೌಶಲ್ಯಗಳು ಘಟಮ್‌ಗೆ ಮಾತ್ರ ಸೀಮಿತವಾಗಿರಲಿಲ್ಲ. ಅವರು ಲಯ ಲಹರಿ ಮೇಳದಂತಹ ವಿನೂತನ ಕಾರ್ಯಕ್ರಮಗಳ ಮೂಲಕ ಜನಸಾಮಾನ್ಯರಿಗೆ ಮತ್ತು ರಸಿಕರಿಗೆ ತಾಳವನ್ನು ಕೊಂಡೊಯ್ದರು.

5 ದಶಕಗಳ ಕಾಲದ ರಂಗ ಸಂಗೀತದ ಜೊತೆಗೆ ರಾಷ್ಟ್ರೀಯ ಮತ್ತು ರಾಜ್ಯ ಪ್ರಶಸ್ತಿಗಳ ಧಾರೆ ವೆಂಕಟರಾಮ್ ಅವರ  ಹೆಸರಿಗೆ ಹೊಂದಿಕೊಂಡಿತ್ತು.  ವೆಂಕಟರಾಮ್ ಅವರು ಸಂಗೀತಗಾರರ ಪ್ರತಿನಿಧಿಯಂತೆ  ಸಂಗೀತಗಾರರ ಹಕ್ಕುಗಳಿಗಾಗಿ ಹೋರಾಡಿದರು. ವಾದ್ಯ ಸಂಗೀತಗಾರರಿಗೆ ಸಲ್ಲಬೇಕಾದ ಸೂಕ್ತ ಸವಲತ್ತುಗಳು ಮತ್ತು ಗೌರವಗಳಿಗಾಗಿ ಶ್ರಮಿಸಿದರು.   

ವೆಂಕಟರಾಮ್ ಅವರು 1969 ರಲ್ಲಿ ಕರ್ನಾಟಕ ಗಾನಕಲಾ ಪರಿಷತ್ (ಕೆಜಿಕೆಪಿ) ಸ್ಥಾಪನೆಯಲ್ಲಿ ಪ್ರಮುಖರಾದವರಾಗಿದ್ದರು. ಅವರು ಇತರ ಕೆಲವು ನಿಷ್ಠಾವಂತ ಸಂಗೀತಗಾರರು ಮತ್ತು ಸಂಘಟಕರೊಂದಿಗೆ ಕೆಜಿಕೆಪಿಯ ವಾರ್ಷಿಕ ಸಂಗೀತ ಸಮ್ಮೇಳನವನ್ನು ಬಹಳ ಹೆಮ್ಮೆ ಮತ್ತು ವೈಭವದಿಂದ ನಡೆಸುತ್ತಿದ್ದರು.

ಬೆಂಗಳೂರು ಕೆ ವೆಂಕಟರಾಮ್ ಅವರು ಪಾಲ್ಘಾಟ್ ಮಣಿ ಅಯ್ಯರ್ ಅವರ ಸ್ಮರಣೆಯನ್ನು ಆಚರಿಸಲು ಮತ್ತು ಸಾಮಾನ್ಯರು ಮತ್ತು ವಿದ್ವಾಂಸರಲ್ಲಿ ತಾಳವಾದ್ಯ ಕಲೆಗಳ ಸೂಕ್ಷ್ಮ ಅಂಶಗಳ ಅರಿವನ್ನು ಉತ್ತೇಜಿಸಲು 1981 ರಲ್ಲಿ ತಾಳವಾದ್ಯ ಕಲಾ ಕೇಂದ್ರವನ್ನು ಸ್ಥಾಪಿಸಿದರು. ಅವರು ತಮ್ಮ ವಿದ್ಯಾರ್ಥಿಗಳಿಗೆ ವಿವಿಧ ತಾಳವಾದ್ಯ ವಾದ್ಯಗಳಲ್ಲಿ ತರಬೇತಿ ನೀಡಿದರು. ತಾಳವಾದ್ಯ ಕಲಾ ಕೇಂದ್ರದ ಸುದ್ದಿಪತ್ರಿಕೆ ‘ತಾಳವಾದ್ಯ’ದ ಸಂಪಾದಕರಾಗಿ ತಮ್ಮ ಜ್ಞಾನ ಮತ್ತು ಸೂಕ್ಷ್ಮ ಒಳನೋಟಗಳನ್ನು ಹಂಚಿಕೊಂಡರು.

ವೆಂಕಟರಾಮ್ ನಿಧನರಾಗುವ ಮೊದಲು ತಿರುನಲ್ವೇಲಿಯಲ್ಲಿ ನಡೆದ ಆಕಾಶವಾಣಿ ಸಂಗೀತ ಸಮ್ಮೇಳನದ ಸಂಗೀತ ಕಚೇರಿಯಲ್ಲಿ ಭಾಗವಹಿಸಿದ್ದರು. ಅವರು 2003ರ ಅಕ್ಟೋಬರ್ 18ರಂದು ನಿಧನರಾದರು. ಅವರ ಪರಂಪರೆಯನ್ನು ಅವರ ಮಗ ವಿದ್ವಾನ್ ಡಾ ಕೃಷ್ಣ ವೆಂಕಟರಾಮ್ ಮತ್ತು ಮಗಳು ಶ್ರೀಮತಿ ಕಲಾವತಿ ಅವಧೂತ್ Kalavathy Avadhoot ಮುಂದುವರಿಸಿದ್ದಾರೆ.

On Remembrance Day of Great percussionist Bengaluru K Venkatram 🌷🙏🌷