ಪ್ರಿನ್ಸ್ ಅಶ್ವತಿ ತಿರುನಾಳ್ ರಾಮ ವರ್ಮ ಅವರು ಕರ್ನಾಟಕ ಸಂಗೀತ ಕ್ಷೇತ್ರದ ವಿಶಿಷ್ಟ ಪ್ರತಿಭೆ. ಅವರು ಸಂಗೀತವನ್ನೇ   ಉಸಿರಾಗಿಸಿಕೊಂಡ  ರಾಜಕುಮಾರ.

ರಾಮ ವರ್ಮ ಅವರು 1968ರ ಆಗಸ್ಟ್ 13ರಂದು ತಿರುವನಂತಪುರದಲ್ಲಿ ಜನಿಸಿದರು.  ಅವರು.ಹಿಂದಿನ ತಿರುವಾಂಕೂರು ರಾಜಮನೆತನದ ವಂಶಸ್ಥರು. ಮಹಾರಾಜ ಸ್ವಾತಿ ತಿರುನಾಳ್ ರಾಮ ವರ್ಮ ಹಾಗೂ ಪ್ರಸಿದ್ಧ ಚಿತ್ರಕಾರ ರಾಜಾ ರವಿವರ್ಮ ಅವರ ವಂಶಪರಂಪರೆಯೊಂದಿಗೆ ಅವರ ಕುಟುಂಬ ಸಂಬಂಧ ಹೊಂದಿದೆ. ಇವೆಲ್ಲಕ್ಕೂ ಮಿಗಿಲಾದುದು ಅವರ ಸಂಗೀತ ಸಾಧನೆ. 

ಬಾಲ್ಯದಿಂದಲೇ ಸಂಗೀತದ ಮೇಲೆ ಅಪಾರ ಆಸಕ್ತಿ ಹೊಂದಿದ್ದ ರಾಮ ವರ್ಮ ಅವರು 1982ರಲ್ಲಿ ತಮ್ಮ ಔಪಚಾರಿಕ ಸಂಗೀತಾಭ್ಯಾಸವನ್ನು ಪ್ರೊ. ವೆಚ್ಚೂರ್ ಹರಿಹರ ಸುಬ್ರಮಣ್ಯ ಅಯ್ಯರ್ ಅವರಲ್ಲಿ ಆರಂಭಿಸಿದರು. ಅವರು ಸೆಮ್ಮಂಗುಡಿ ಶ್ರೀನಿವಾಸ ಅಯ್ಯರ್ ಅವರ ಶಿಷ್ಯರಾಗಿದ್ದರು. ಮುಂದೆ ರಾಮ ವರ್ಮ ಅವರು ಮಹಾನ್ ಸಂಗೀತ ವಿದ್ವಾಂಸರಾದ ಡಾ. ಮಂಗಳಂಪಳ್ಳಿ ಬಾಲಮುರಳಿಕೃಷ್ಣ ಅವರ ಶಿಷ್ಯತ್ವವನ್ನು ಸ್ವೀಕರಿಸಿದರು. ವೀಣಾ ವಾದನದಲ್ಲಿ ತಿರುವನಂತಪುರಂ ಆರ್. ವೆಂಕಟರಾಮನ್ ಹಾಗೂ ಸಂಗೀತ ಕಲಾನಿಧಿ ಪ್ರೊ. ಕೆ. ಎಸ್. ನಾರಾಯಣಸ್ವಾಮಿ ಅವರಿಂದಲೂ ತರಬೇತಿ ಪಡೆದರು. 

ಗಾಯನ ಮತ್ತು ಸರಸ್ವತಿ ವೀಣೆ—ಈ ಎರಡೂ ಕ್ಷೇತ್ರಗಳಲ್ಲಿ ರಾಮ ವರ್ಮ ಅವರ ಸಾಧನೆ ಗಮನಾರ್ಹ. ಅವರ ಸಂಗೀತದಲ್ಲಿ ಪರಂಪರೆಯ ಶಿಸ್ತು, ರಾಗಭಾವದ ಸೂಕ್ಷ್ಮತೆ ಮತ್ತು ಭಾವಪೂರ್ಣ ನಿರೂಪಣೆ ಒಂದಾಗಿ ಕಾಣಿಸುತ್ತವೆ. 1990ರಲ್ಲಿ ಅವರ ಸಾರ್ವಜನಿಕ ಸಂಗೀತ ಪ್ರವೇಶವಾಯಿತು. ನಂತರ ಭಾರತದಲ್ಲಷ್ಟೇ ಅಲ್ಲದೆ ಯುರೋಪ್, ಅಮೆರಿಕ, ಮಧ್ಯಪ್ರಾಚ್ಯ ಸೇರಿದಂತೆ ಹಲವು ದೇಶಗಳಲ್ಲಿ ಅವರು ಸಂಗೀತ ಕಛೇರಿಗಳನ್ನು ನೀಡಿದ್ದಾರೆ.

ರಾಮ ವರ್ಮ ಅವರ ವಿಶೇಷ ಕೊಡುಗೆಗಳಲ್ಲಿ ಸ್ವಾತಿ ತಿರುನಾಳ್ ಅವರ ಕೃತಿಗಳ ಪ್ರಸಾರ ಅತ್ಯಂತ ಪ್ರಮುಖವಾದುದು. ಸ್ವಾತಿ ತಿರುನಾಳ್ ಅವರು ಅಲ್ಪಾಯುಷ್ಯದಲ್ಲಿಯೇ ಸಂಸ್ಕೃತ, ಮಲಯಾಳಂ, ಹಿಂದಿ, ಕನ್ನಡ ಮತ್ತು ತೆಲುಗು ಭಾಷೆಗಳಲ್ಲಿ 300ಕ್ಕೂ ಹೆಚ್ಚು ಕೃತಿಗಳನ್ನು ರಚಿಸಿದ ಮಹಾನ್ ರಾಜ, ಕವಿ ಮತ್ತು ಸಂಗೀತಗಾರರಾಗಿದ್ದರು. ಅವರ ಅಪರೂಪದ ಕೃತಿಗಳನ್ನು ಹುಡುಕಿ, ಅಧ್ಯಯನ ಮಾಡಿ, ಹೊಸ ಪೀಳಿಗೆಗೆ ಪರಿಚಯಿಸುವಲ್ಲಿ ರಾಮ ವರ್ಮ ಅವರು ಮಹತ್ವದ ಕೆಲಸ ಮಾಡಿದ್ದಾರೆ. 

ರಾಮ ವರ್ಮ ಅವರ ಮತ್ತೊಂದು ವಿಶಿಷ್ಟತೆ ಅಂದರೆ, ಸಂಗೀತವನ್ನು ಜನಸಾಮಾನ್ಯರಿಗೆ ಹತ್ತಿರವಾಗಿಸುವ ಪ್ರಯತ್ನ. ಕಛೇರಿಗಳಲ್ಲಿ ಹಾಡುಗಳನ್ನು ಹಾಡುವುದಷ್ಟೇ ಅಲ್ಲದೆ, ಅದರ ರಾಗ, ಸಾಹಿತ್ಯ, ಹಿನ್ನೆಲೆ ಮತ್ತು ಸಂಗೀತದ ಸೌಂದರ್ಯವನ್ನು ಸರಳವಾಗಿ ವಿವರಿಸುವ ಮೂಲಕ ಶ್ರೋತೃಗಳಿಗೆ ಸಂಗೀತಾಸ್ವಾದನೆಯ ಅನುಭವವನ್ನು ತಂದು ಕೊಡುತ್ತಾರೆ. ಈ ಕಾರಣದಿಂದ ಅವರ ಕಛೇರಿಗಳು ಪಂಡಿತರಿಂದ ಸಾಮಾನ್ಯನವರೆಗೆ ಎಲ್ಲ ಬಗೆಯ ಸಂಗೀತಾಸಕ್ತರನ್ನೂ ಸೆಳೆಯುತ್ತ ಬಂದಿವೆ.

ತಮ್ಮ ಗುರುಗಳ ಪರಂಪರೆಯನ್ನು ಗೌರವಿಸುವುದರ ಜೊತೆಗೆ, ಸಂಗೀತದ ಗಡಿಗಳನ್ನು ವಿಸ್ತರಿಸುವ ಮನೋಭಾವವೂ ರಾಮ ವರ್ಮ ಅವರಲ್ಲಿದೆ. ಭಾರತೀಯ ಶಾಸ್ತ್ರೀಯ ಸಂಗೀತದ ಜೊತೆಗೆ ಇತರ ದೇಶಗಳ ಸಂಗೀತವನ್ನೂ ಆಸಕ್ತಿಯಿಂದ ಆಲಿಸುವ ಅವರು, ಉತ್ತಮ ಸಂಗೀತಕ್ಕೆ ಭಾಷೆ, ದೇಶ ಅಥವಾ ಶೈಲಿಯ ಗಡಿಗಳಿಲ್ಲ ಎಂಬ ನಿಲುವನ್ನು ಹೊಂದಿದ್ದಾರೆ.

ರಾಮ ವರ್ಮ ಅವರು ಸಂಗೀತಗಾರರಷ್ಟೇ ಅಲ್ಲ; ವಕ್ತಾರ, ಸಂಗೀತಾಸಕ್ತ, ಸಂಘಟಕ ಮತ್ತು ಸಂಗೀತಪ್ರಚಾರಕರೂ ಆಗಿದ್ದಾರೆ. ಸ್ವಾತಿ ಸಂಗೀತೋತ್ಸವದಂತಹ ಕಾರ್ಯಕ್ರಮಗಳ ಮೂಲಕ ಸ್ವಾತಿ ತಿರುನಾಳ್ ಅವರ ಸಂಗೀತ ಪರಂಪರೆಯನ್ನು ವಿಶಾಲ ಪ್ರೇಕ್ಷಕರಿಗೆ ತಲುಪಿಸುವ ಕೆಲಸದಲ್ಲಿಯೂ ಅವರು ಪ್ರಮುಖ ಪಾತ್ರ ವಹಿಸಿದ್ದಾರೆ. 

ಪ್ರಿನ್ಸ್ ರಾಮ ವರ್ಮ ಅವರಿಗೆ ಪುರಂದರ ಅಚಾರ್ಯ ಪ್ರಶಸ್ತಿ, ಸಂಗೀತ ಚಕ್ರವರ್ತಿ ಬಿರುದು ಮುಂತಾದ ಹಲವು ಗೌರವಗಳು ಸಂದಿವೆ.

Prince Aswathi Thirunal Rama Varma  🌷🙏🌷