ಬಾರೋ ವಸಂತ

ಬಾರೋ ವಸಂತ ಬಾರೋ ಬಾ

ಬಾರೋ ವಸಂತ ಬಾರೋ

ಹೊಸ ಹೊಸ ಹರುಷದ ಹರಿಕಾರ

ಹೊಸ ಭಾವನೆಗಳ ಹೊಸ ಕಾಮನೆಗಳ

ಎದೆಯಲಿ ಬರೆಯುವ ನುಡಿಕಾರ

ಬಾರೋ ವಸಂತ ಬಾರೋ ಬಾ

ಬಾರೋ ಸಂಕಲೆಗಳ ಕಳಚಿ

ಹೆಜ್ಜೆಗಳಿಗೆ ಪ್ರಾಣವನುಣಿಸಿ

ದಣಿದ ಮೈಗೆ ತಂಗಾಳಿಯ ಮನಸಿಗೆ

ನಾಳೆಯ ಸುಖದೃಶ್ಯವ ಸಲಿಸಿ

ಬಾರೋ ವಸಂತ ಬಾರೋ ಬಾ

ಮಗುಚುತ ನಿನ್ನೆಯ ದುಃಖಗಳ

ತೆರೆಯುತ ಹೊಸ ಅಧ್ಯಾಯಗಳ

ಹರಸುತ ಎಲ್ಲರ ಮೇಲು ಕೀಳೆನದೆ

ಸಲಿಸುತ ಭವಿಷ್ಯದಾಸೆಗಳ

ಬಾರೋ ವಸಂತ ಬಾರೋ ಬಾ

ಎಳೆಕಂದನ ದನಿ ಗೆಜ್ಜೆಯಲಿ

ಇನಿಯಳ ಮಲ್ಲಿಗೆ ಲಜ್ಜೆಯಲಿ

ಗೋಳುಬಾಳಿನಲಿ ಹಸಿರ ಚಿಮ್ಮಿಸುವ

ಸೃಷ್ಟಿ ಶೀಲ ಹೊಸ ಹೆಜ್ಜೆಯಲಿ

ಬಾರೋ ವಸಂತ ಬಾರೋ ಬಾ

ಬಾರೋ ವಸಂತ ಬಾರೋ

ಸಾಹಿತ್ಯ: ಎನ್. ಎಸ್.ಲಕ್ಶ್ಮಿನಾರಾಯಣ ಭಟ್ಟ

Tag: Baro Vasanta

ಹಂಚಿ

ತಮ್ಮ ಸಲಹೆಗಳಿಗೆ ಸುಸ್ವಾಗತ!

ಸಂಸ್ಕೃತಿ ಸಲ್ಲಾಪ