ನರಹಳ್ಳಿ ಬಾಲಸುಬ್ರಹ್ಮಣ್ಯ
ನರಹಳ್ಳಿ ಬಾಲಸುಬ್ರಹ್ಮಣ್ಯ
ಕನ್ನಡ ಸಾಹಿತ್ಯಲೋಕದಲ್ಲಿ ಡಾ. ನರಹಳ್ಳಿ ಬಾಲಸುಬ್ರಹ್ಮಣ್ಯ ವಿದ್ವತ್ಪೂರ್ಣ ವಿಮರ್ಶೆಗೆ ಹೆಸರಾದವರು. ಸಾಹಿತ್ಯದ ಅತಿ ಸಂಕೀರ್ಣ ಸಂಗತಿಗಳನ್ನು ಅತಿ ಸ್ವಾರಸ್ಯಕರವಾಗಿ ಹಾಗೂ ಸರಳ ರೀತಿಯಲ್ಲಿ ವಿಶ್ಲೇಷಿಸುವುದರಲ್ಲಿ ಅವರು ಪ್ರಸಿದ್ಧಿ ಪಡೆದಿದ್ದಾರೆ.
ನರಹಳ್ಳಿ ಬಾಲಸುಬ್ರಹ್ಮಣ್ಯ 1953ರ ಸೆಪ್ಟೆಂಬರ್ 5ರಂದು ಮಂಡ್ಯ ಜಿಲ್ಲೆಯ ನರಹಳ್ಳಿಯಲ್ಲಿ ಜನಿಸಿದರು. ತಂದೆ ಶಿವರಾಮಯ್ಯ. ತಾಯಿ ರಾಜಲಕ್ಷಮ್ಮ. ಬಾಲಸುಬ್ರಹ್ಮಣ್ಯರ ಪ್ರಾರಂಭಿಕ ಶಾಲಾ ಓದು ನರಹಳ್ಳಿ, ಸುಂಕಾ ತೊಣ್ಣೂರು ಮತ್ತು ನಾಗಮಂಗಲಗಳಲ್ಲಿ ನೆರವೇರಿತು. ಅವರು ಪ್ರಪ್ರಥಮ ಶ್ರೇಣಿಯ ಸಾಧನೆಯೊಡನೆ ಬೆಂಗಳೂರು ವಿಶ್ವವಿದ್ಯಾಲಯದಿಂದ ಕನ್ನಡ ಬಿ.ಎ. ಆನರ್ಸ್ ಪದವಿ ಹಾಗೂ ಪ್ರಪ್ರಥಮ ಶ್ರೇಣಿಯ ಕನ್ನಡ ಎಂ.ಎ. ಪದವಿ ಗಳಿಸಿ ಬಿ.ಎಂ.ಶ್ರೀ, ರಾಜರತ್ನಂ ಸ್ವರ್ಣ ಪದಕ ಪಡೆದುದೇ ಅಲ್ಲದೆ ಅತ್ಯುತ್ತಮ ವಿದ್ಯಾರ್ಥಿ ಎಂಬ ರಾಜ್ಯ ಪ್ರಶಸ್ತಿ ಹಾಗೂ ಭಾರತ ಸರಕಾರದ ಪ್ರತಿಭಾ ವಿದ್ಯಾರ್ಥಿವೇತನ ಪಡೆದ ಪ್ರತಿಭಾವಂತರು.
ಮುಂದೆ ಬಾಲಸುಬ್ರಹ್ಮಣ್ಯರು 'ಆಧುನಿಕ ಕಾವ್ಯದ ಹಿನ್ನೆಲೆಯಲ್ಲಿ ಕೆ.ಎಸ್.ನ. ಕಾವ್ಯ - ಒಂದು ಅಧ್ಯಯನ’ ಎಂಬ ಪ್ರೌಢಪ್ರಬಂಧ ಮಂಡಿಸಿ ಬೆಂಗಳೂರು ವಿಶ್ವವಿದ್ಯಾಲಯದಿಂದ ಡಾಕ್ಟರೇಟ್ ಪದವಿ ಪಡೆದರು. ಕೆ.ಎಸ್.ನ ಬಗ್ಗೆ ಇವರ ಮತ್ತೊಂದು ಮಹತ್ವದ ಕೃತಿಯೆಂದರೆ ಪೂರ್ಣ ಪ್ರಮಾಣದ ಸಂದರ್ಶನ ಕೃತಿಯಾದ ‘ಕೆ.ಎಸ್.ನ: ನುಡಿಮಲ್ಲಿಗೆ’. ಇದು ಕನ್ನಡ ಸಾಹಿತ್ಯದಲ್ಲಿ ಪ್ರಕಟವಾಗಿರುವ ಈ ಮಾದರಿಯ ಮೊದಲ ಕೃತಿ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ.
ಶಿಕ್ಷಕರ ದಿನಾಚರಣೆಯಂದು ಹುಟ್ಟಿದ ನರಹಳ್ಳಿಯವರು ಶಿಕ್ಷಕರಾಗಿ ಸಹಾ ಮಹತ್ವದ ಸೇವೆ ಸಲ್ಲಿಸಿ ಗುರುಸ್ಥಾನವನ್ನು ಅಲಂಕರಿಸಿದವರು. ಬೆಂಗಳೂರು ಶೇಷಾದ್ರಿಪುರಂ ಕಾಲೇಜು ಕನ್ನಡ ವಿಭಾಗಕ್ಕೆ ಸೇರಿ ಪ್ರಾಧ್ಯಾಪಕರಾಗಿ, ವಿಭಾಗದ ಮುಖ್ಯಸ್ಥರಾಗಿ, ಪ್ರಾಂಶುಪಾಲರಾಗಿ ಸೇವೆ ಸಲ್ಲಿಸಿ ನಿವೃತ್ತರಾಗಿದ್ದಾರೆ.
ಕಳೆದ ಐದು ದಶಕಗಳಿಗೂ ಮೀರಿ ನಿರಂತರವಾಗಿ ಸಾಹಿತ್ಯಿಕ ಅನುಸಂಧಾನದಲ್ಲಿ ತೊಡಗಿಕೊಂಡಿರುವ ಬಾಲಸುಬ್ರಹ್ಮಣ್ಯರು, ತಮ್ಮ ಸ್ವಯಂ ಪ್ರತಿಭೆಯಿಂದ ವಿಮರ್ಶನ ಕ್ಷೇತ್ರದಲ್ಲಿ ತಮ್ಮದೇ ಆದ ಅಭಿವ್ಯಕ್ತಿಯನ್ನು ನಿರೂಪಿಸಿದ್ದಾರೆ. ಅವರು ಯಾವುದೇ ಪ್ರಾಚೀನ ಕೃತಿಯನ್ನು ಕುರಿತು ಹೇಳುವಾಗ ಅದನ್ನು ಆಧುನಿಕ ಪ್ರಸ್ತುತತೆಯ ನಿಟ್ಟಿನಲ್ಲಿ ಪರಿಶೀಲಿಸುವಂತೆಯೇ, ಆಧುನಿಕ ಕೃತಿಯನ್ನು ವಿಮರ್ಶೆಗೆ ಒಡ್ಡುವಾಗ ಸಹಾ ಪಾರಂಪರಿಕವಾಗಿ ಅದು ಪಡೆಯಬಹುದಾದ ಅರ್ಥವನ್ನು ವಿವೇಚಿಸ ಹೊರಡುವುದು ವೈಶಿಷ್ಟ್ಯಪೂರ್ಣ.
ನರಹಳ್ಳಿ ಬಾಲಸುಬ್ರಹ್ಮಣ್ಯರು, ಜನಪರ ಸಂಸ್ಕೃತಿಯನ್ನು ಕುರಿತು ಹೇಳುವಾಗ, ಇಂದಿನ ಕೊಳ್ಳುಬಾಕ ಸಂಸ್ಕೃತಿಯನ್ನು ಉತ್ತೇಜಿಸುವ ಮೂಲಾಧಾರವಾದ ಸ್ನಾಯುಬಲದಿಂದ ಹೆಚ್ಚುತ್ತಿರುವ ದ್ವೇಷ, ಅಸಹನೆ, ಹಿಂಸೆ ಮುಂತಾದವುಗಳು ಇಂದಿನ ಜೀವನ ಕ್ರಮದಲ್ಲಿ ಹೇಗೆ ಅನಿವಾರ್ಯವಾಗಿ ಬಿಟ್ಟಿದೆ ಎಂಬುದನ್ನು ವಿವೇಚಿಸುವ ಸಂದರ್ಭದಲ್ಲಿ, ಗಾಂಧೀಜಿಯವರ ಸರಳತೆ, ಪ್ರೀತಿಸುವ ಶಕ್ತಿ, ಪ್ರಾಮಾಣಿಕತೆ ಹಾಗೂ ಸಮುದಾಯದ ಬಗೆಗಿನ ಕಾಳಜಿಗಳ ಬಗ್ಗೆ ಗಮನ ಹರಿಯುವಂತೆ ಮಾಡುತ್ತಾರೆ. ಸಾಹಿತ್ಯಪರ ಚಿಂತನೆ ಮಾಡುವಾಗಲೆಲ್ಲಾ, ಕಳೆದ ಶತಮಾನದ ಸಾಹಿತ್ಯವನ್ನೂ ಅರ್ಥೈಸುವ, ಜೊತೆಗೆ ಮರುಚಿಂತನೆಗೆ ಗುರಿಪಡಿಸುವ ಅಗತ್ಯತೆಯನ್ನೂ ಅವರು ಒತ್ತಿ ಹೇಳುತ್ತಾರೆ. ಇಂದಿನ ದಿನಗಳಲ್ಲಿ ಜನಸಮುದಾಯವನ್ನು ಕಾಡುತ್ತಿರುವ ಭೂಮಿಯ ಕುರಿತಾಗಿ ಬದಲಾಗುತ್ತಿರುವ ಸಾಂಸ್ಕೃತಿಕ ಧೋರಣೆ, ಕೃಷಿ ಸಂಸ್ಕೃತಿ, ವೃತ್ತಿ ಸಂಸ್ಕೃತಿ ಮುಂತಾದ ವಿಷಯಗಳ ಕುರಿತಾಗಿನ ಅವರ ಚಿಂತನೆಗಳು ಮನನೀಯವಾಗಿದೆ.
ನರಹಳ್ಳಿ ಬಾಲಸುಬ್ರಹ್ಮಣ್ಯರು ಚಿಂತನೆ ನಡೆಸಿ ಪ್ರಕಟಿಸಿರುವ ಪ್ರಮುಖ ಎರಡು ಪೂರ್ಣ ಪ್ರಮಾಣದ ಕೃತಿಗಳೆಂದರೆ ಕುವೆಂಪುರವ ನಾಟಕಗಳ ಅಧ್ಯಯನ ಮತ್ತು ಕುವೆಂಪು ಕಾವ್ಯವನ್ನು ಕುರಿತ ಗ್ರಂಥಗಳು ಮತ್ತು ಜಿ.ಎಸ್. ಶಿವರುದ್ರಪ್ಪನವರ ಕಾವ್ಯದ ಸಮಗ್ರ ಅಧ್ಯಯನದ ಕೃತಿ ‘ಹಣತೆಯ ಹಾಡು’.
ನರಹಳ್ಳಿ ಬಾಲಸುಬ್ರಹ್ಮಣ್ಯರ ಮೊದಲ ವಿಮರ್ಶಾ ಲೇಖನಗಳ ಸಂಕಲನ ‘ಅನುಸಂಧಾನ’ ಪ್ರಕಟಗೊಂಡಾಗ ಅದೊಂದು ಗಮನಾರ್ಹ ಕೃತಿಯೆನಿಸಿ ಅವರನ್ನು ವಿಮರ್ಶಕರ ಸಾಲಿನಲ್ಲಿ ಪ್ರತಿಷ್ಟಾಪಿಸಿತು. ಆ ನಂತರದಲ್ಲಿ ಪ್ರಕಟವಾದ ಅವರ ವಿಮರ್ಶಾ ಕೃತಿಗಳಲ್ಲಿ ನವ್ಯತೆ, ಸಾಹಿತ್ಯ ಸಂಸ್ಕೃತಿ, ಇಹರ ಪರಿಮಳದ ಹಾದಿ, ಅರಿವಿನ ಬಂಡಾಯ ಮತ್ತು ಪ್ರಬಂಧ ಸಂಕಲನವಾದ ‘ಅಂತರಂಗದ ಮೃದಂಗ’ ಸೇರಿವೆ.
ಅ.ನ.ಕೃ ಅವರು ಕಾದಂಬರಿಕಾರ, ಗಂಭೀರ ಅಧ್ಯಯನಕ್ಕೆ ಅರ್ಹರಲ್ಲ ಎಂಬ ಲಘು ಹೇಳಿಕೆಯನ್ನು ಸುಳ್ಳಾಗಿಸಲು, ಎಲ್ಲಾ ಪೂರ್ವಾಗ್ರಹವನ್ನೂ ಬದಿಗಿಟ್ಟು ಅವರ ಕೃತಿಗಳ ವಿಮರ್ಶೆ ನಡೆಸಿ ನರಹಳ್ಳಿ ಬಾಲಸುಬ್ರಹ್ಮಣ್ಯರು ರಚಿಸಿದ ಮೌಲಿಕ ಕೃತಿ ‘ಅ.ನ.ಕೃ ಮತ್ತು ಕನ್ನಡ ಸಂಸ್ಕೃತಿ’.
ಅನುವಾದ ಪ್ರಕಾರದಲ್ಲಿಯೂ ನರಹಳ್ಳಿ ಬಾಲಸುಬ್ರಹ್ಮಣ್ಯರು ನೊಬಲ್‌ ಪ್ರಶಸ್ತಿ ಪುರಸ್ಕೃತರಾದ ಐಸಾಕ್‌ ಬಾಷೆ ವಿಸ್‌ ಸಿಂಗರ್ ಅವರ ಕತೆಗಳ ಅನುವಾದ ‘ಸಿಂಗರ್ ಕತೆಗಳು’, ‘ಗೇಬ್ರಿಯಲ್‌ ಗಾರ್ಸಿಯ ಮಾರ್ಕ್ವೆಜ್‌ ಕತೆಗಳು’ ಮತ್ತು ಮತ್ತೊಬ್ಬ ನೊಬೆಲ್ ಪ್ರಶಸ್ತಿ ಪುರಸ್ಕೃತ ಆಂದ್ರೆಜೀದ್‌ ಅವರ ಕಾದಂಬರಿ ಅನುವಾದವಾದ ‘ಕಡಿದಾದ ಹಾದಿ’ ಮುಂತಾದವುಗಳನ್ನೂ ಕನ್ನಡಿಗರಿಗೆ ಕೊಟ್ಟಿದ್ದಾರೆ.
ನರಹಳ್ಳಿ ಬಾಲಸುಬ್ರಹ್ಮಣ್ಯ ಅವರು ಇತರರೊಡನೆ ಸಂಪಾದಿಸಿರುವ ಕೃತಿಗಳಲ್ಲಿ ಕ್ರಿಸ್ತಾಂಜಲಿ, 1982ರ ವಿಮರ್ಶೆ, ಹೊಸಹೆಜ್ಜೆ, ಕಥನ ಕವನಗಳು, ಸಂಗ್ರಹ ಷಟ್ಪದಿ ಮತ್ತು ಅಪೂರ್ವ ಕೃತಿಗಳು ಮುಂತಾದವು ಸೇರಿವೆ.
ನರಹಳ್ಳಿ ಬಾಲಸುಬ್ರಹ್ಮಣ್ಯ ಅವರು ಸಾಹಿತ್ಯ ನಿರ್ಮಾಣ, ವಿಮರ್ಶೆಯ ಜೊತೆ ಜೊತೆಗೇ ಹಲವಾರು ಸಂಘ-ಸಂಸ್ಥೆಗಳೊಡನೆ ಸಕ್ರಿಯ ಒಡನಾಟ ಹೊಂದಿದ್ದು ಕನ್ನಡ ಸಾಹಿತ್ಯ ಪರಿಷತ್ತಿನ ಗೌರವ ಕಾರ್ಯದರ್ಶಿಗಳಾಗಿ ಸಹಾ ಕಾರ್ಯನಿರ್ವಹಿಸಿದ್ದಾರೆ. ಶೇಷಾದ್ರಿಪುರಂ ಕಾಲೇಜಿನ ಕನ್ನಡ ಸಂಘವನ್ನು ಕಟ್ಟಿ ಬೆಳೆಸಿದ್ದಲ್ಲದೆ ಆ ಸಂಘದ ಮೂಲಕ ಅನೇಕ ಮಹತ್ವದ ಕೃತಿ ಪ್ರಕಟಣೆಗಳಲ್ಲಿ ಮಹತ್ವದ ಪಾತ್ರವಹಿಸಿದ್ದರು. ಅನೇಕ ಸಂಘ-ಸಂಸ್ಥೆಗಳ ಸಲಹೆಗಾರರಾಗಿಯೂ ಕಾರ್ಯನಿರ್ವಹಿಸಿದ್ದಾರೆ. ವಿಶ್ವವಿದ್ಯಾಲಯ, ಸಾಹಿತ್ಯ ಅಕಾಡೆಮಿ, ಕನ್ನಡ ಸಂಸ್ಕೃತಿ ಇಲಾಖೆ, ಕನ್ನಡ ಸಾಹಿತ್ಯ ಪರಿಷತ್ತು ಮುಂತಾದ ಕನ್ನಡ ಸಂಸ್ಥೆಗಳು ಮುಂಬಯಿ, ಚೆನ್ನೈ, ಕಾಸರಗೋಡು, ಒರಿಸ್ಸಾ, ದೆಹಲಿ ಮುಂತಾದೆಡೆಗಳಲ್ಲಿ ಆಯೋಜಿಸಿರುವ ವಿಚಾರ ಸಂಕಿರಣಗಳಲ್ಲಿ ಪ್ರತಿನಿಧಿಗಳಾಗಿ ಸಹಾ ಸೇವೆ ಸಲ್ಲಿಸಿ ವಿವಿಧ ರೀತಿಯಲ್ಲಿ ಕನ್ನಡದ ಏಳಿಗೆಗಾಗಿ ದುಡಿದಿದ್ದಾರೆ.
ಬಿಡಿಯಾಗಿ ಓದಿ ವಿಮರ್ಶಿಸುವ ಕ್ರಮಕ್ಕಿಂತ ಇಡಿಯಾಗಿ ಓದಿ ವಿಮರ್ಶಿಸುವಂತಹ ಅಧ್ಯಯನ ಕ್ರಮದ ಬಗ್ಗೆ ಕಾಳಜಿ ಹೊಂದಿರುವ ನರಹಳ್ಳಿಯವರ ಸಾಧನೆಯನ್ನು ಗುರುತಿಸಿರುವ ಕನ್ನಡ ನಾಡು, ವಿ.ಎಂ. ಇನಾಂದಾರ್ ಪ್ರಶಸ್ತಿ, ಆದರ್ಶ ಸಾಹಿತ್ಯರತ್ನ ಪ್ರಶಸ್ತಿ, ಜಿ.ಎಸ್.ಎಸ್. ಪ್ರಶಸ್ತಿ, ಆರ್ಯಭಟ ಪ್ರಶಸ್ತಿ, ಕಾವ್ಯಾನಂದ ಪ್ರಶಸ್ತಿ, ವಿಶ್ವಮಾನವ ಪ್ರಶಸ್ತಿ, ಸ.ಸ. ಮಾಳವಾಡ ಪ್ರಶಸ್ತಿ, ಗೋರಖನಾಥ ಪುರಸ್ಕಾರ (ಬೆಂಗಳೂರು) ಮುಂತಾದ ಹಲವಾರು ಪ್ರಶಸ್ತಿ ಗೌರವಗಳನ್ನು ಸಲ್ಲಿಸಿ ಗೌರವಿಸಿದೆ.
ಡಾ. ನರಹಳ್ಳಿ ಬಾಲಸುಬ್ರಹ್ಮಣ್ಯ ಅವರ ಕುರಿತು ಹಿರಿಯ ವಿಮರ್ಶಕರಾದ ಡಾ. ಎಲ್. ಎಸ್. ಶೇಷಗಿರಿರಾವ್ ಅವರು ಹೀಗೆ ಹೇಳುತ್ತಾರೆ: “ನಾನು ಅನಕೃ ಅವರ ಕಿರಿಯ ಸಮಕಾಲೀನ. ಅವರೊಡನೆ ಚರ್ಚೆಗಳನ್ನು ಮಾಡಿದವನು. ಅವರ ಕಾರ್ಯವೈಖರಿಯನ್ನು ಕಂಡವನು, ಅವರ ಬರಹಗಳು ಪ್ರಕಟವಾಗುತ್ತಿದ್ದಂತೆಯೆ ಓದಿದವನು, ಅವನ್ನು ಕುರಿತು ಚಿಂತಿಸಿದವನು, ಒಮ್ಮೊಮ್ಮೆ ಅವರೊಡನೆಯೆ ಚರ್ಚೆ ಮಾಡಿದವನು, ಜಗಳವನ್ನೂ ಆಡಿದವನು. ಆದರೆ ನರಹಳ್ಳಿಯವರ 'ಅನಕೃ ಮತ್ತು ಕನ್ನಡ ಸಂಸ್ಕೃತಿ' ಎನ್ನುವ ಪುಸ್ತಕವನ್ನು ಓದಿದಾಗ ಡಾ. ನರಹಳ್ಳಿಯವರು ಹೊಚ್ಚಹೊಸ ಅಂಶಗಳನ್ನು ನಿರೂಪಿಸಿದ್ದನ್ನು ಕಂಡು ಆಶ್ಚರ್ಯವಾಯಿತು, ಸಂತೋಷವಾಯಿತು. ಅವರು ಕುವೆಂಪು ಅವರ ಮೇಲೆ ಬರೆಯಲಿ, ವ್ಯಾಸರಾಯ ಬಲ್ಲಾಳರ ಮೇಲೆ ಬರೆಯಲಿ, ಜಿ.ಎಸ್. ಅಮೂರರ ಮೇಲೆ ಬರೆಯಲಿ, ಎ.ಕೆ. ರಾಮಾನುಜನ್ ಅವರ ಮೇಲೆ ಬರೆಯಲಿ, ಜಿಡ್ಡು ಕೃಷ್ಣಮೂರ್ತಿ ಅವರ ಮೇಲೆ ಬರೆಯಲಿ, ನಾವು ಯೋಚಿಸಬೇಕಾದ ಹಲವು ಅಂಶಗಳನ್ನು ಮುಂದಿಡುತ್ತಾರೆ. ಸಮುದಾಯದ ಸಂಸ್ಕೃತಿಯಲ್ಲಿ ಆಳವಾದ ಆಸಕ್ತಿ ಇರುವ ನರಹಳ್ಳಿಯವರು ವ್ಯಕ್ತಿಯ ಭಾವ ಜಗತ್ತಿಗೂ ಗಮನ ಕೊಡುತ್ತಾರೆ. ನಾನು ಗಮನಿಸಿರುವ ಒಂದು ಅಂಶವೆಂದರೆ ಅವರ ಬರಹ ಎಷ್ಟೇ ವಿದ್ವತ್ಪೂರ್ಣವಾಗಿರಲಿ, ಚಿಂತನಶೀಲವಾಗಿರಲಿ ಓದುವಾಗ ಸಂತೋಷವನ್ನು ಕೊಡುತ್ತದೆ. ಸೊಗಸಾದ ವಿಮರ್ಶೆಯನ್ನು ಸಂತೋಷ ಕೊಡುವ ಶೈಲಿಯಾಗಿ ಸ್ಪಷ್ಟವಾದ ಮಾತುಗಳಲ್ಲಿ ಲಭ್ಯಮಾಡಿಕೊಡಬಲ್ಲವರು ಅವರು. ಅವರು ಕನ್ನಡ ಸಾಹಿತ್ಯ ವಿಮರ್ಶೆಯ ಕ್ಷೇತ್ರಕ್ಕೆ ಒಂದು ಆಸ್ತಿ.”
ಡಾ. ನರಹಳ್ಳಿ ಬಾಲಸುಬ್ರಹ್ಮಣ್ಯ ಅವರಿಗೆ ಜನ್ಮದಿನದ ಹಾರ್ದಿಕ ಶುಭ ಹಾರೈಕೆಗಳು.
On the birthday of our scholar and writer Dr. Narahalli Balasubrahmanya
ಕಾಮೆಂಟ್‌ಗಳು