ದೀಪಾವಳಿ

ನಕ್ಕಂತೆ ಇರುವ ಸಿರಿಮೊಗವೆ ! – ಅದಕೆ

ತಕ್ಕಂತೆ ಇರುವ ಕಣ್ ಬೆಳಕೆ ! –

ನಿಂತಂತೆ ಕಾಣುವ ನಿರಾತಂಕ ದೀಪವೆ !

ಅಂತರಂಗದ ಜೀವ ನದಿಯೆ !

ನಕ್ಕಂತೆ ಇರುವ ಸಿರಿಮೊಗವೆ ! – ಹೂಗೆನ್ನೆ-

ಗುಕ್ಕುವಂತಿರುವ ನೊರೆಹಾಲೆ !

ತಂತಿಯಲಿ ಇಂಪು ಹರಿದಂತೆ ಈ ಮನೆಯೊಳಗೆ

ಸಂತಸದ ನೆಲೆಯಾದ ಚೆಲುವೆ !

ನಕ್ಕಂತೆ ಇರುವ ಸಿರಿಮೊಗವೆ ! – ಕೆಂದುಟಿಗೆ

ಚಿಮ್ಮಿ ಬಹ ವೀಣೆಯೊಳದನಿಯೆ !

ತುಂಬು ಹೆರಳಲಿ ಹಿಡಿದ ಹಂಬಲದ ಹೊಸ ಹೂವೆ,

ಅಲ್ಲೆಲ್ಲ ನಿನ್ನ ಪರಿಮಳವೆ !

ದೀಪವನು ಹಚ್ಚಿ ಬಹ ಹೆಣ್ಣೆ! – ಆ ಬೆರಳೆ

ಮಿಂಚಿನಲಿ ಬಳ್ಳಿ ಬರೆದಂತೆ.

ಹಣತೆಗಳ ನಡುವೆ ಹೊಂಬೆರಳು ಹರಿದಾಡುತಿದೆ

ವೀಣೆಯಲಿ ಬೆರಳು ಬರುವಂತೆ.

ಎಷ್ಟೊಂದು ತಾರೆಗಳು ಮೇಲೆ, ಗಗನದಲಿ ! –

ಎಷ್ಟೊಂದು ಬೆಳಕು ಭೂಮಿಯಲಿ !

ಹಬ್ಬದಲಿ ತೊಳೆದಿಟ್ಟ ಈ ಬದುಕೆ ಬೆಳಕಾಗಿ

ಹೂವಾಯ್ತು ನಿನ್ನ ಪ್ರೇಮದಲಿ.

ಹಣತೆಯನು ಹಚ್ಚಿ ಬಿಡು, ಬಾಗಿಲಲಿ ಇಟ್ಟುಬಿಡು;

ನಿನ್ನಿಂದ ದೀಪಾವಳಿ.

ಬರುವ ಸಡಗರದಲ್ಲೆ ಮುತ್ತೊಂದ ಕೊಟ್ಟುಬಿಡು,

ಕೊಡೆನೆಂದು ನಗುತ ಹೇಳಿ.

ಸಾಹಿತ್ಯ: ಕೆ. ಎಸ್. ನರಸಿಂಹಸ್ವಾಮಿ

('ಕನ್ನಡ ಸಂಪದ'ದಲ್ಲಿ ಮೂಡಿಬರುತ್ತಿರುವ ಕವಿತೆಗಳನ್ನು ನಮ್ಮ 'ಸಂಸ್ಕೃತಿ ಸಲ್ಲಾಪ' ತಾಣವಾದwww.sallapa.com ನಲ್ಲಿ ಆಸ್ವಾದಿಸಲು ತಮ್ಮನ್ನು ಆದರದಿಂದ ಸ್ವಾಗತಿಸುತ್ತಿದ್ದೇವೆ.  ನಮಸ್ಕಾರ)