ಭಾರತದ ಮಾಜಿ ಪ್ರಧಾನಿ ರಾಜೀವ್ ಗಾಂಧಿ 1944ರ ಆಗಸ್ಟ್ 20ರಂದು ಜನಿಸಿದರು.

ರಾಜೀವ್ ಗಾಂಧಿ ಈ ಲೋಕ ಬಿಟ್ಟು ಹೋಗಿಯೇ 35 ವರ್ಷ ಆಗಿ ಹೋಯಿತು.  ಅಂದಿನ ದಿನ (ಮೇ 21, 1991) ಇನ್ನೂ ಮಂಪರು ನಿದ್ರೆಯಲ್ಲಿ, ಇದೇನಿದು ಹಜಾರದಲ್ಲಿ ಇಷ್ಟು ಬೆಳಿಗ್ಗೆ ಟಿ.ವಿ ಯಾಕೆ ಹಾಕಿದ್ದಾರೆ ಎಂದು ಕಣ್ಣುಜ್ಜುತ್ತಾ ಬಂದಾಗ ಈ ಸುರದ್ರೂಪಿ ಮಾಜಿ ಪ್ರಧಾನಿ ಹತ್ಯೆಯಾಗಿದ್ದು ನೋಡಿ ದಿಗ್ಭ್ರಮೆಗೊಂಡಿದ್ದು ನೆನೆಪಿದೆ.  ರಾಜೀವ್ ಗಾಂಧಿ ಸಮಾಧಿ ಮಾಡಿದ ದಿನದ ಸಂದರ್ಭದಲ್ಲಿ ನಾನು ಕೊಲ್ಲೂರಿನಲ್ಲಿದ್ದೆ.  ಆ ಊರಿನ ಒಬ್ಬ ವರ್ತಕ ಅಂಗಡಿ ಮುಚ್ಚುತ್ತಿದ್ದ.  ಇದೇಕೆ ನಿಮಗೆ ಯಾರಾದರೂ ಗಲಾಟೆ ಮಾಡುತ್ತಾರೆ ಎಂದು ಭಯವೇ ಅಂಗಡಿ ಮುಚ್ಚುತ್ತಿದ್ದೀರ ಅಂತ ಕೇಳಿದೆ?  ಆತ ಹೇಳಿದ, "ನನಗೆ ರಾಜೀವ್ ಗಾಂಧಿ ಅಂದರೆ ತುಂಬಾ ಗೌರವ ಅದಕ್ಕೇ ಅಂಗಡಿ ಮುಚ್ಚುತ್ತಿದ್ದೇನೆ". 

ಕೇಂಬ್ರಿಡ್ಜ್ ವಿಶ್ವವಿದ್ಯಾಲಯದಲ್ಲಿ ಓದಿ ಇಟಾಲಿಯನ್ ಹುಡುಗಿ ಪ್ರೇಮ ಮಾಡಿ ಮದುವೆಯಾಗಿ ಪೈಲಟ್ ಆಗಿ ಜೀವನ ಸಾಧಿಸುತ್ತಿದ್ದ ಈ ಸುಂದರ ಮಗನನ್ನು ಇಂದಿರಾಗಾಂಧಿ ತಮ್ಮ ಮತ್ತೊಬ್ಬ ಪುತ್ರ ಅಪಘಾತದಲ್ಲಿ ಅಸುನೀಗಿದ ಸಂದರ್ಭದಲ್ಲಿ ಮತ್ತು ತಮಗಿದ್ದ ಇನ್ನಿತರ ಹಲವು ಅಭದ್ರತೆಗಳ ಹಿನ್ನೆಲೆಯಲ್ಲಿ   ರಾಜಕೀಯಕ್ಕೆ ತಂದುಕೊಂಡರು.

ಆಗಿನ ಸಂದರ್ಭದಲ್ಲಿ ಈ ಹುಡುಗ ಮುಗ್ದನಾಗಿದ್ದ.  ಭಾರತದಲ್ಲಿ ಹೀಗಾಗುತ್ತದೆ ಎಂದು ಯಾರೂ ಊಹಿಸದಿದ್ದ ಹಾಗೆ ಇಂದಿರಾ ಗಾಂಧಿಯವರ ಹತ್ಯೆಯಾದಾಗ, ಒಬ್ಬ ಹಂಗಾಮಿ ಪ್ರಧಾನ ಮಂತ್ರಿಯಾಗಿ ರಕ್ಷಣಾ ಸಚಿವರನ್ನು ಮಾಡಬೇಕು ಎಂಬ ಔಚಿತ್ಯ ಕೂಡಾ ಮೀರಿ ಕಾಂಗ್ರೆಸ್ ಪಕ್ಷ, ರಾಜೀವ್ ಗಾಂಧಿಯನ್ನು ಪ್ರಧಾನಿ ಪಟ್ಟಕ್ಕೆ ತಂದಿತು.  

ನಮ್ಮ ದೇಶದಲ್ಲಿ ಒಂದು ಯುದ್ದ ಮತ್ತು ಒಂದು ಕೊಲೆ ಜನಗಳ ಸಂವೇದನೆಯನ್ನು ಅತೀ ಆಳವಾಗಿ ತಟ್ಟಿಬಿಡುತ್ತೆ.  'ಇಂದಿರಾ ಗಾಂಧೀ ಪುತ್ರ ರಾಜೀವ್ ಗಾಂಧಿ ನಾಯಕ'ನೆಂದು  ಹೇಳಿಕೊಂಡ ಪಕ್ಷ ನಿರಾಯಾಸವಾಗಿ 542 ಸ್ಥಾನಗಳಲ್ಲಿ 411 ಸ್ಥಾನಗಳನ್ನು ಪಡೆದು ದೇಶದ ಕಡಿವಾಣವನ್ನು ರಾಜೀವ್ ಗಾಂಧೀ ಕೈಯಲ್ಲಿ ಒಪ್ಪಿಸಿತು.   

ರಾಜೀವ್ ಗಾಂಧಿ ಭರವಸೆಯನ್ನು ಹುಟ್ಟಿಸಿದರು. ಲೈಸೆನ್ಸ್ ರಾಜ್ ಬುಡವನ್ನು ಭಾರತದಲ್ಲಿ ಪ್ರಥಮವಾಗಿ ಅಲ್ಲಾಡಿಸಿದರು. ಟ್ಯಾರಿಫ್‍ಗಳು, ಪರವಾನಗಿಗಳನ್ನು ಬೇಡಬೇಕಾದ ಸ್ಥಿತಿಯನ್ನು ಕಡಿಮೆ ಮಾಡುವ ಸಾಧ್ಯತೆಗಳನ್ನು ತೋರಿದರು.  ಟೆಲಿ ಸಂಪರ್ಕ ವ್ಯವಸ್ಥೆಗಳು, ಶಿಕ್ಷಣ ವ್ಯವಸ್ಥೆ, ವಿಜ್ಞಾನ ಮತ್ತು ತಂತ್ರಜ್ಞಾನ ವ್ಯವಸ್ಥೆ ಇವುಗಳಲ್ಲೆಲ್ಲಾ ಹೊಸ ಉತ್ಸಾಹ, ಆಸಕ್ತಿಗಳು ಮೊಳಗುವತ್ತ ನೋಟ ಬೀರಿದರು. ಅಮೆರಿಕದೊಡನೆ ಸ್ನೇಹ ಸೇತು ಬೆಳೆಸಿದರು.    

ರಾಜೀವ್ ಗಾಂಧಿ ಅಧಿಕಾರದ ಅವಧಿಯಲ್ಲಿ ನಮ್ಮ ಆರ್. ಕೆ. ಲಕ್ಷ್ಮಣ್ ಒಂದು ಕಾರ್ಟೂನ್ ಬರೆದಿದ್ರು.  ಆ ಕಾರ್ಟೂನಿನಲ್ಲಿ ಒಬ್ಬ ಮನೆಯಲ್ಲಿ ಕೂತುಕೊಂಡು ರಾಜೀವ್ ಗಾಂಧೀ ಫೋಟೋನೇ ನೋಡ್ತಾ ಕೂತಿದ್ದ!  ಅದಕ್ಕೆ ಕೆಳಗಿದ್ದ ವಿವರಣೆ "ಆತನ ಮನೆಯ ಟಿ.ವಿ. ಕೆಟ್ಟು ಹೋಗಿದೆ!". 

ಇಂದಿರಾ ಗಾಂಧಿ ನಿಧನರಾದ ಸಂದರ್ಭದಲ್ಲಿ ಪ್ರಣಬ್ ಮುಖರ್ಜಿ ಅವರು ತಾನು ಪ್ರಧಾನಿ ಆಗಬೇಕು ಅಂತ ಒಂದು ಚೂರು ಆಸೆ ಇಟ್ಟುಕೊಂಡು ಒಂದಿಬ್ಬರನ್ನು ಸಂಪರ್ಕಿಸಿದ್ದರು ಅಂತ ಗೊತ್ತಾಗಿ, ಅಂತಹ ಮೇಧಾವಿಯನ್ನು ರಾಜೀವ್ ಗಾಂಧಿ ಮೂಲೆ ಗುಂಪು ಮಾಡಿದ್ರು.  ಸ್ವಾಭಿಮಾನಿಗಳಾದ ವಿಶ್ವನಾಥ್ ಪ್ರತಾಪ್ ಸಿಂಗ್, ಅರುಣ್ ಸಿಂಗ್ ಅವರುಗಳು ಭಿನ್ನಮತ ತಳೆದರು.  (ಇಂದಿನಂತಿಲ್ಲದ) ಅಂದಿನ ನಿಷ್ಠ ಪತ್ರಿಕೋದ್ಯಮ ಬೋಫೋರ್ಸ್ ವ್ಯವಹಾರದಲ್ಲಿನ ಅವ್ಯವಹಾರಗಳನ್ನು ಬಯಲಿಗೆಳೆದು ಪ್ರಧಾನಿ ಅವರ ವರ್ಚಸ್ಸಿಗೆ ಹಾನಿ ತಂದಿತು. ತಾಯಿ ಇಂದಿರಾ ಗಾಂಧಿ ಅವರ  ಹತ್ಯೆ ಸಂದರ್ಭದಲ್ಲಿ ಸಿಖ್ಖರ ಮೇಲೆ  ದೆಹಲಿಯಲ್ಲಿ ಅಮಾನುಷ ಹಿಂಸೆಗಳು  ನಡೆದವು.  ತಮಿಳು ಉಗ್ರಗಾಮಿಗಳ ನಿಗ್ರಹದ ಕಾರ್ಯಾಚರಣೆಯಲ್ಲಿ ಭಾರತೀಯ ಸೇನೆ ಬಹಳಷ್ಟು ಸೈನಿಕರ ಜೀವ ನಷ್ಟವಾಯಿತು.  

ರಾಜೀವ್ ಗಾಂಧಿ ಅವರಿಗೆ ಇದ್ದ ಉತ್ಸಾಹ ಅಪಾರ.  ತಾವು ಮಾಡ್ತಾ ಇರೋ ದೊಡ್ಡ ದೊಡ್ಡ ಪ್ರಚಾರದ, "ಭಾರತವನ್ನು ಅಮೇರಿಕಾ ಮಾಡಿ ಬಿಡ್ತೇನೆ!" ಎಂಬ ಕಲ್ಪನೆಗಳು ಭಾರತೀಯ ಮೂಲ ತಂತುವನ್ನ, ಕಷ್ಟ ನಷ್ಟಗಳನ್ನ ಅನುಭವಿಸುತ್ತಿರುವ  ಸಾಧಾರಣ ಭಾರತೀಯರನ್ನು ಸ್ಪಂದಿಸುತ್ತಿಲ್ಲ ಎಂದು ಅವರಿಗೆ ಗೊತ್ತಾಗುವ ಒಳಗೆ ಅವರ ಅಧಿಕಾರಾವಧಿ ಕೂಡಾ ಗತಿಸಿ ಹೋಗಿತ್ತು.  ವೀರೇಂದ್ರ ಪಾಟೀಲ್ ಅಂತಹ ಹೆಸರಿದ್ದ ನಾಯಕರು ಅನಾರೋಗ್ಯದಲ್ಲಿದ್ದ ಸಂದರ್ಭದಲ್ಲಿಯೇ, ಆ ಜಾಗದಲ್ಲಿ ಬಂಗಾರಪ್ಪನವರನ್ನು ತಂದದ್ದು ಕರ್ನಾಟಕದ ಜನ ಸಮುದಾಯಕ್ಕೆ ಒಪ್ಪಿತವಾಗಿರಲಿಲ್ಲ.  ಎಲ್ಲೋ ಅವರಿಗೆ ಒಂದು ಸಮರ್ಥ ತಂಡವನ್ನು ಬೆಳೆಸುವುದು ಸಾಧ್ಯವಾಗಲಿಲ್ಲ.  ದೊಡ್ಡ ಬೆಂಬಲ ಕೊಟ್ಟಿದ್ದ ಜನತೆಯ ನಿರೀಕ್ಷೆಗಳು ಫಲಿಸದೆ,  ಸೋಲು ಅವರನ್ನು ಹಿಂಬಾಲಿಸಿತ್ತು. 

ರಾಜೀವ್ ಗಾಂಧಿ ಮುಂದೆ ಅಧಿಕಾರ ಕಳೆದುಕೊಂಡರೂ ತಮ್ಮ ತಪ್ಪುಗಳನ್ನು ತಿದ್ದಿಕೊಂಡು ಭಾರತಕ್ಕೆ ಉತ್ತಮ ಭವಿಷ್ಯಕ್ಕೆ ಕಾಯಕ ಮಾಡುತ್ತಾರೇನೊ ಎಂದು ಭಾರತೀಯರು ಭಾವಿಸಿದ್ದರು.  ಆದರೆ ಆತ ತಮಿಳು ಉಗ್ರಗಾಮಿಗಳಿಗೆ ಹತ್ಯೆ ಆಗಿದ್ದು ನೆನೆಸಿಕೊಂಡರೆ ಈಗಲೂ ನೋವಾಗುತ್ತದೆ.

ಹಸನ್ಮುಖಿ ಮತ್ತು ಉತ್ಸಾಹಿ ರಾಜೀವ್ ಗಾಂಧಿ ಅವರ ನೆನಪು, ಹಲವು ದೆಸೆಗಳಲ್ಲಿ ನಮ್ಮ ನೆನಪುಗಳಿಂದ ಮಾಸದೆ ಉಳಿದಿದೆ.