ಪರಮಲೋಭಿ ಎಂಬುದರಿಯೆ ಶ್ರೀಹರಿಯೆ (ಪ) 

ಕಾಡಿ ಬೇಡುವರಿಗೆ ಕೊಡಲಾರದೆ ಅಂಜಿ 

ಓಡಿ ನೀರೊಳು ಸೇರಿಕೊಂಡೆ ಬೇಗ 

ಹೇಡಿಯ ತೆರದಲಿ ಮೋರೆಯ ತೋರದೆ 

ಓಡಿ ಅರಣ್ಯದಿ ಮೃಗಗಳ ಸೇರ್ದೆ (ಚ-೧) 

ಬಡವರ ಬಿನ್ನಹ ಲಾಲಿಸದೆ ಹಲ್ಲ 

ಕಡು ಕೋಪದಲಿ ತೆರೆದಂಜಿಸಿದೆ 

ತಡೆಯದೆ ಭಿಕ್ಷುಕನಾದರೆ ಬಿಡರೆಂದು 

ಕೊಡಲಿಯ ಪಿಡಿದು ಕೋಡಗ ಹಿಂಡ ಕಾಯ್ದೆ (ಚ-೨) 

ಉತ್ತಮನೆಂದರೆ ಮತ್ತೆ ಚೋರನಾದೆ 

ಬತ್ತಲೆ ನಿಂತೆ ತೇಜಿಯನೇರಿದೆ 

ಎತ್ತಹೋದರು ಬಿಡೆ ಮತ್ತೆ ನಿನ್ನನು ದೇವ 

ಚಿತ್ತಜ ಜನಕ ಶ್ರೀ ಪುರಂದರವಿರಲ (ಚ-೩) 

------------

ಸಾಹಿತ್ಯ: ಪುರಂದರದಾಸರು

ಭಾರತೀಯ ಸರ್ವಭಾಷಾ ಸಾಹಿತ್ಯ ಪರಂಪರೆಯಲ್ಲಿ ನಿಂದಾಸ್ತುತಿಗಳಿಗೆ ಮಹತ್ವದ ಸ್ಥಾನವಿದೆ. ಅದರಲ್ಲೊಂದು ರಚನೆಯಾದ 

ಇದೂ ಸಹ ನಿಂದಾಸ್ತುತಿಯ ಪ್ರಕಾರಕ್ಕೆ ಸೇರಿದ ಒಂದು ದಾಸರ ಪದ. ಆದಿಪ್ರಾಸವಿರುವ  ಈ ರಚನೆಯಲ್ಲಿ ಪುರಂದರದಾಸರು ದಶಾವತಾರಗಳನ್ನು ಸೂಕ್ಷ್ಮವಾಗಿ, ಸ್ವಾರಸ್ಯವಾಗಿ ಚಿತ್ರಿಸಿದ್ದಾರೆ. ಒಂದೇ ಸಾಲಿನಲ್ಲಿ ಎರಡು ಅವತಾರಗಳನ್ನು ಸಂಗ್ರಹಿಸಿರುವ ಜಾಣ್ಮೆಯನ್ನೂ ಗಮನಿಸಬೇಕು. "ಕೊಡಲಿಯ ಪಿಡಿದು” (ಪರಶುರಾಮ), “ಕೋಡಗ ಹಿಂಡ ಕಾಯ್ದೆ” (ರಾಮ) ; ಬತ್ತಲೆ ನಿಂತು (ಬುದ್ಧ) ತೇಜಿಯನೇರಿದೆ (ಕಲ್ಕಿ ). 

ದಶಾವತಾರದ ರಚನೆಗಳು ದಾಸರ ಕಾಲದಲ್ಲಿ ಹೆಚ್ಚಾದವು. ಸಂಗೀತಶಾಸ್ತ್ರ ಗ್ರಂಥಗಳಲ್ಲಿ ದಶಾವತಾರ ಪ್ರಬಂಧಗಳ ಮೊದಲ ಉಲ್ಲೇಖವು ಪಂಡರೀಕವಿಠಲನ ನರ್ತನನಿರ್ಣಯದಲ್ಲಿ ಕಾಣುತ್ತದೆ. 

ಹಿಂದಿನ ಮಟ್ಟಿನಲ್ಲಿ ಈ ಮೇಲಿನ ರಚನೆಯು 

ಶಂಕರಾಭರಣ ರಾಗದಲ್ಲೂ ತ್ರಿವಿಡೆ ತಾಳದಲ್ಲೂ ರೂಢಿಯಿತ್ತೆಂದು ಪ್ರೊ. ಎಸ್. ಕೆ. ರಾಮಚಂದ್ರ ರಾಯರ ಪುಸ್ತಕದಲ್ಲಿ ದಾಖಲಾಗಿದೆ.

ಕೃಪೆ: ರೋಹಿಣಿ ಸುಬ್ಬುರತ್ನಂ Rohini Subbarathnam 🌷🙏🌷