ಸುಮಾ ಅನಿಲ್ ಎಂಬ ಅಳಿಯದ ನೆನಪು 

On Remembrance Day of our affectionate Suma Anil 🌷🙏🌷

ನಮ್ಮೆಲ್ಲರ ಅಕ್ಕರೆಯ ಸುಮಾ ಅನಿಲ್ ಅವರ ಸಂಸ್ಮರಣೆ ದಿನವಿದು. 

ಸುಮಾ ಅನಿಲ್ ಅವರು ನಿರ್ಮಲ ನಗೆಯ ಸ್ನೇಹ ಜೀವಿ, ಸಮಾಜಮುಖಿ ಮತ್ತು ಕನ್ನಡ ಕಾರ್ಯಕರ್ತೆಯಾಗಿದ್ದವರು. ಅವರು ನನ್ನಲ್ಲಿ ತುಂಬಾ ಆತ್ಮಭಾವ ಮೂಡಿಸಿದ್ದ ಸಹೃದಯಿ.

ಸುಮಾ ಅನಿಲ್ ಅವರ ಪರಿಚಯ ಭಾಗ್ಯ ನನಗೆ ದಕ್ಕಿದ್ದು, ನಾನು ನನ್ನ ಪ್ರೀತಿಯ ಅಕ್ಕನ ಬಗ್ಗೆ ಬರೆದಾಗ ಅವರು, ನನ್ನಲ್ಲಿದ್ದ ನನ್ನಕ್ಕನ ಭಾವವನ್ನೇ, ನನ್ನಕ್ಕನ ಶಿಷ್ಯೆ ಎಂದು ಹೇಳಿಕೊಂಡು ತೋರಿದ ಅಂತರಂಗ ತುಂಬಿದ ಅನುಭೂತಿಯಿಂದ.  ಒಂದು ರೀತಿಯಲ್ಲಿ ನನ್ನಕ್ಕನ ಪ್ರೀತಿಯನ್ನೇ, ಇದುವರೆಗೂ ನೇರವಾಗಿ ಕಾಣದಿರುವ ಈ ತಂಗಿಯ ಸಂವಹನದಲ್ಲಿ ಕಂಡಿದ್ದೆ.

ಸುಮಾ ಅನಿಲ್ ಒಂದು ಎನ್‍ಜಿಓಗೆ ಕೆಲಸ ಮಾಡುತ್ತಿದ್ದರು.  ಸರಕಾರಿ ಶಾಲೆಗಳ ಸಹಾಯದಿಂದ ವಿಶೇಷ ಚೇತನ ಮಕ್ಕಳನ್ನು ಮುಖ್ಯ ವಾಹಿನಿಗೆ ಸಿದ್ಧ ಮಾಡುತ್ತಿದ್ದರು.  ಪ್ರಮುಖವಾಗಿ, ಆರ್ಥಿಕವಾಗಿ ಹಿಂದುಳಿದ ಮಕ್ಕಳು ಮತ್ತು ಗ್ರಾಮೀಣ ಭಾಗದ ಮಕ್ಕಳು ಇವರು ಕಾರ್ಯಕ್ಷೇತ್ರದ ಕಾಳಜಿಗಳಲ್ಲಿದ್ದರು.  ಅದರ ಜೊತೆಗೆ ಇವರು  www.kannadagottilla.com ತಂಡದ ಜೊತೆ ಸೇರಿ ಕನ್ನಡೇತರರಿಗೆ ಕನ್ನಡ ಕಲಿಸುತ್ತಿದ್ದರು.

ಸುಮಾ ಅವರ ಸುಮಸುಂದರ ನಿರ್ಮಲ ನಗೆ ಕಂಡಾಗ ಅನಿಸುತ್ತಿತ್ತು "ತನ್ನ ಬಗ್ಗೆ ಚಿಂತಿಸದೆ ಲೋಕದ ಹಿತಚಿಂತನೆ ಮಾಡುವವರಿಗೆ ಮಾತ್ರವೇ ಇದು ಸಾಧ್ಯ" ಎಂದು.  

ಆತ್ಮೀಯರಾದ, ನನ್ನ ಸಹೋದರಿ ಎಂಬ ಭಾವ ತುಂಬಿಸಿದ್ದ ಸಹೃದಯಿ 2024 ವರ್ಷ ಡಿಸೆಂಬರ್ 5ರಂದು ನಮ್ಮನ್ನಗಲಿದರು ಅಂದರೆ ನಂಬಲಾಗುತ್ತಿಲ್ಲ.  ನಮ್ಮ ಲೋಕದ ಮತ್ತೊಂದು ಪರಮಾಪ್ತತೆಯನ್ನು ಕ್ಯಾನ್ಸರ್ ನಮ್ಮಿಂದ ಕಿತ್ತುಕೊಂಡಿತು.

I miss you ನನ್ನಕ್ಕರೆಯ ಮುದ್ದು ತಂಗಿ ಸುಮಾ ❤️ ನೀನೆಲ್ಲಿದ್ದರೂ ನಮ್ಮ ಹೃದಯದಲ್ಲಿ ಶಾಶ್ವತ.