ರವಿಶಂಕರ್ ಮಹಾರಾಜ್
ರವಿಶಂಕರ್ ಮಹಾರಾಜ್
ರವಿಶಂಕರ್ ವ್ಯಾಸ್ ಅವರು ರವಿಶಂಕರ್ ಮಹಾರಾಜ್ ಎಂದು ಚಿರಪರಿಚಿತರಾದ ಭಾರತೀಯ ಸ್ವಾತಂತ್ರ್ಯ ಹೋರಾಟಗಾರರು, ಸಮಾಜ ಸೇವಕರು ಮತ್ತು ಗಾಂಧಿವಾದಿ.
ರವಿಶಂಕರ್ ವ್ಯಾಸ್ ಅವರು 1884ರ ಫೆಬ್ರವರಿ 25, ಮಹಾಶಿವರಾತ್ರಿ ದಿನದಂದು ಈಗ ಭಾರತದ ಗುಜರಾತ್‌ನ ಖೇಡಾ ಜಿಲ್ಲೆಯಲ್ಲಿರುವ ರಾಧು ಗ್ರಾಮದಲ್ಲಿ ಜನಿಸಿದರು. ತಂದೆ ಪಿತಾಂಬರ ಶಿವರಾಮ್ ವ್ಯಾಸ್. ತಾಯಿ ನತಿಬಾ. ಇವರು ವಡಾರಾ ಬ್ರಾಹ್ಮಣ ರೈತ ಕುಟುಂಬಕ್ಕೆ ಸೇರಿದವರು. ಅವರ ಕುಟುಂಬದವರು ಮಹೇಮದವಾಡ ಸಮೀಪದ ಸರ್ಸವಾನಿ ಗ್ರಾಮದವರು. ತಂದೆ ತಾಯಿಗೆ ಕೃಷಿ ಕೆಲಸದಲ್ಲಿ ಸಹಾಯ ಮಾಡಲು ಆರನೇ ತರಗತಿಯ ನಂತರ ಶಾಲೆ ಬಿಟ್ಟರು. ಅವರು ಸೂರಜ್ಬಾ ಅವರನ್ನು ವಿವಾಹವಾದರು. ಅವರು 19 ವರ್ಷದವರಾಗಿದ್ದಾಗ ಅವರ ತಂದೆ ನಿಧನರಾದರು ಮತ್ತು 22 ವರ್ಷದವರಾಗಿದ್ದಾಗ ಅವರ ತಾಯಿ ನಿಧನರಾದರು.
ರವಿಶಂಕರ್ ವ್ಯಾಸ್ ಅವರು ಆರ್ಯ ಸಮಾಜದ ತತ್ವದಿಂದ ಪ್ರಭಾವಿತರಾಗಿದ್ದರು. ಅವರು 1915ರಲ್ಲಿ ಮಹಾತ್ಮ ಗಾಂಧಿಯವರನ್ನು ಭೇಟಿಯಾದರು. ಮುಂದೆ ಗಾಂಧೀಜಿ ಅವರ ಸ್ವಾತಂತ್ರ್ಯ ಮತ್ತು ಸಾಮಾಜಿಕ ಚಟುವಟಿಕೆಗೆ ಸೇರಿದರು. ಅವರು ಗಾಂಧಿ ಮತ್ತು ಸರ್ದಾರ್ ವಲ್ಲಭಭಾಯಿ ಪಟೇಲ್ ಅವರ ಆರಂಭಿಕ ಮತ್ತು ಸಮೀಪ ಸಹವರ್ತಿಗಳಲ್ಲಿ ಒಬ್ಬರಾಗಿದ್ದರು. ಇವರೊಂದಿಗೆ ದರ್ಬಾರ್ ಗೋಪಾಲದಾಸ್ ದೇಸಾಯಿ, ನರಹರಿ ಪಾರಿಖ್ ಮತ್ತು 1920 ಮತ್ತು 1930 ರ ದಶಕಗಳಲ್ಲಿ ಗುಜರಾತ್‌ನಲ್ಲಿ ರಾಷ್ಟ್ರೀಯವಾದಿ ದಂಗೆಗಳ ಮುಖ್ಯ ಸಂಘಟಕರಾದ ಮೋಹನ್ ಲಾಲ್ ಪಾಂಡ್ಯ ಸಹಾ ಜೊತೆಯಿದ್ದರು. ಅವರು ಕರಾವಳಿ ಮಧ್ಯ ಗುಜರಾತ್‌ನ ಬಾರಯ್ಯ ಮತ್ತು ಪತನವಾಡಿಯ ಜಾತಿಗಳ ಪುನರ್ವಸತಿಗಾಗಿ ಹಲವು ವರ್ಷಗಳ ಕಾಲ ಕೆಲಸ ಮಾಡಿದರು. ಅವರು 1920 ರಲ್ಲಿ ಸುನವ್ ಗ್ರಾಮದಲ್ಲಿ ರಾಷ್ಟ್ರೀಯ ಶಾಲೆ (ರಾಷ್ಟ್ರೀಯ ಶಾಲೆ) ಅನ್ನು ಸ್ಥಾಪಿಸಿದರು. ಅವರು ಪತ್ನಿಯ ಆಸೆಗೆ ವಿರುದ್ಧವಾಗಿ ಪೂರ್ವಜರ ಆಸ್ತಿಯ ಮೇಲಿನ ಹಕ್ಕುಗಳನ್ನು ತೊರೆದರು ಮತ್ತು 1921ರಲ್ಲಿ ಭಾರತೀಯ ಸ್ವಾತಂತ್ರ್ಯ ಚಳವಳಿಗೆ ಸೇರಿದರು. ಅವರು 1923ರಲ್ಲಿ ಬೋರ್ಸಾದ್ ಸತ್ಯಾಗ್ರಹದಲ್ಲಿ ಭಾಗವಹಿಸಿದರು ಮತ್ತು ಹೈದೀಯ ತೆರಿಗೆ ವಿರುದ್ಧ ಪ್ರತಿಭಟಿಸಿದರು. ಅವರು 1928 ರಲ್ಲಿ ಬಾರ್ಡೋಲಿ ಸತ್ಯಾಗ್ರಹದಲ್ಲಿ ಭಾಗವಹಿಸಿದರು ಮತ್ತು ಆರು ತಿಂಗಳ ಕಾಲ ಬ್ರಿಟಿಷ್ ಅಧಿಕಾರದಿಂದ ಜೈಲಿನಲ್ಲಿದ್ದರು. ಅವರು 1927 ರಲ್ಲಿ ಪ್ರವಾಹದ ಪರಿಹಾರ ಕಾರ್ಯದಲ್ಲಿ ಭಾಗವಹಿಸಿದರು ಅದು ಅವರಿಗೆ ಮನ್ನಣೆಯನ್ನು ತಂದುಕೊಟ್ಟಿತು. ಅವರು 1930 ರಲ್ಲಿ ಉಪ್ಪಿನ ಸತ್ಯಾಗ್ರಹದಲ್ಲಿ ಗಾಂಧಿಯವರೊಂದಿಗೆ ಸೇರಿಕೊಂಡರು ಮತ್ತು ಎರಡು ವರ್ಷಗಳ ಕಾಲ ಜೈಲುವಾಸ ಅನುಭವಿಸಿದರು. 1942 ರಲ್ಲಿ, ಅವರು ಕ್ವಿಟ್ ಇಂಡಿಯಾ ಚಳವಳಿಯಲ್ಲಿ ಭಾಗವಹಿಸಿದರು ಮತ್ತು ಅಹಮದಾಬಾದ್‌ನಲ್ಲಿ ಕೋಮು ಹಿಂಸಾಚಾರವನ್ನು ಶಾಂತಗೊಳಿಸಲು ಪ್ರಯತ್ನಿಸಿದರು.
1947 ರಲ್ಲಿ ಭಾರತಕ್ಕೆ ಸ್ವಾತಂತ್ರ್ಯ ಬಂದ ನಂತರ, ರವಿಶಂಕರ್ ವ್ಯಾಸ್ ಅವರು ಸಾಮಾಜಿಕ ಕಾರ್ಯಗಳಲ್ಲಿ ತಮ್ಮನ್ನು ತೊಡಗಿಸಿಕೊಂಡರು. ಅವರು ಭೂದಾನ ಚಳವಳಿಯಲ್ಲಿ ವಿನೋಬಾ ಭಾವೆ ಅವರೊಂದಿಗೆ ಸೇರಿಕೊಂಡರು ಮತ್ತು 1955 ಮತ್ತು 1958 ರ ನಡುವೆ 6000 ಕಿಲೋಮೀಟರ್ ಪ್ರಯಾಣಿಸಿದರು. 1960 ರ ದಶಕದಲ್ಲಿ ಅವರು ಸರ್ವೋದಯ ಚಳವಳಿಯನ್ನು ಸಂಘಟಿಸಿದರು ಮತ್ತು ಬೆಂಬಲಿಸಿದರು. ರವಿಶಂಕರ್ ಮಹಾರಾಜ್ ಗುಜರಾತ್ ರಾಜ್ಯವನ್ನು 1960ರ ಮೇ 1ರಂದು ರಚಿಸಿದಾಗ ಅದನ್ನು ಉದ್ಘಾಟಿಸಿದರು. ಅವರು 1975ರಲ್ಲಿ ತುರ್ತು ಪರಿಸ್ಥಿತಿಯನ್ನು ಸಹ ವಿರೋಧಿಸಿದರು. ಅವರ ಮರಣದವರೆಗೂ, ಗುಜರಾತ್‌ನ ಹೊಸದಾಗಿ ನೇಮಕಗೊಂಡ ಪ್ರತಿಯೊಬ್ಬ ಮುಖ್ಯಮಂತ್ರಿ ಪ್ರಮಾಣ ವಚನ ಸ್ವೀಕರಿಸಿದ ನಂತರ ಅವರನ್ನು ಭೇಟಿ ಮಾಡಿ ಆಶೀರ್ವಾದ ಪಡೆಯುವುದು ಸಂಪ್ರದಾಯವಾಗಿತ್ತು. ಅವರು 1 ಜುಲೈ 1984 ರಂದು ಗುಜರಾತ್‌ನ ಬೋರ್ಸಾದ್‌ನಲ್ಲಿ ನಿಧನರಾದರು. ಅವರಿಗೆ ಸಮರ್ಪಿತವಾದ ಸ್ಮಾರಕವು ಬೋಚಸನ್ ಎಂಬಲ್ಲಿರು ವಲ್ಲಭ ವಿದ್ಯಾಲಯದ ಅಧ್ಯಾಪನ್ ಮಂದಿರದಲ್ಲಿದೆ.
ರವಿಶಂಕರ್ ವ್ಯಾಸ್ ಅವರು ಶಿಕ್ಷಣ, ಗ್ರಾಮೀಣ ಪುನರ್ನಿರ್ಮಾಣ ಮತ್ತು ಕೋಲ್ಕತ್ತಾದ ಬಗ್ಗೆ ಬರೆದಿದ್ದಾರೆ.
ಭಾರತ ಸರ್ಕಾರವು 1984 ರಲ್ಲಿ ರವಿಶಂಕರ್ ವ್ಯಾಸ್ ಅವರ ಗೌರವಾರ್ಥ ಅಂಚೆ ಚೀಟಿಯನ್ನು ಬಿಡುಗಡೆ ಮಾಡಿತು. ರೂ 1 ಲಕ್ಷ ಮೌಲ್ಯದ ರವಿಶಂಕರ್ ಮಹಾರಾಜ್ ಪ್ರಶಸ್ತಿಯನ್ನು ಸಾಮಾಜಿಕ ಕಾರ್ಯಕ್ಕಾಗಿ ದುಡಿದವರಿಗಾಗಿ ಗುಜರಾತ್ ಸರ್ಕಾರದ ಸಾಮಾಜಿಕ ನ್ಯಾಯ ಇಲಾಖೆಯು ಸ್ಥಾಪಿಸಿದೆ.
On the birth anniversary of great freedom fighter and social reformer Ravishankar Maharaj
ಕಾಮೆಂಟ್‌ಗಳು