ಗಿರಿಜಾ ರೈಕ್ವಾ
ಗಿರಿಜಾ ರೈಕ್ವಾ
ಗಿರಿಜಾ ರೈಕ್ವಾ ಅಸಾಮಾನ್ಯ ಚಾರಿತ್ರಿಕ, ಸಾಂಸ್ಕೃತಿಕ, ಪ್ರಕೃತಿ ಪ್ರೀತಿಯ, ವಿವೇಚನಾಶೀಲ, ಸ್ನೇಹಮಯಿ ಪರ್ಯಟನಗಾರ್ತಿ ಮತ್ತು ಜ್ಞಾನಾಕಾಂಕ್ಷಿ. ಅತ್ಯುತ್ತಮ ಮಾರ್ಗದರ್ಶಿ ಮತ್ತು ನಿರೂಪಕಿಯೂ ಆದ ಅವರು ವಿಷಯಗಳನ್ನು ಮಂಡಿಸುವಾಗ ತೋರುವ ಸುಸ್ಪಷ್ಟತೆ, ಅದರ ಹಿಂದಿರುವ ಆಳವಾದ ಅಧ್ಯಯನ, ಪೂರ್ವಾಗ್ರಹಗಳಿಲ್ಲದೆ ಪ್ರತಿಯೊಂದನ್ನೂ ಮುಕ್ತವಾಗಿ ಕಾಣುವ ನಿರ್ಮಲ ದೃಷ್ಟಿಕೋನ ಮತ್ತು ಪ್ರತಿಯೊಂದು ಧ್ವನಿಯನ್ನೂ ಆಲಿಸುವ ಸೂಕ್ಷ್ಮ ಸೌಹಾರ್ದತೆ ಇವೆಲ್ಲ ಅವರೊಡನೆ ಸಂವಹನ ಮತ್ತು ಪರ್ಯಟನೆ ನಡೆಸಿದವರಿಗೆ ಅಪಾರ ಮೆಚ್ಚುಗೆಯ ಬೆರಗು ಮೂಡಿಸುತ್ತಿದೆ. ಇತ್ತೀಚೆಗೆ ಅವರ 'ಬೆಂಗಳೂರು ವಾಕಿ ಟಾಕಿ' ಎಂಬ ನಡೆಯಲ್ಲಿ ಪಾಲ್ಗೊಂಡಾಗ ನನಗೆ ದೊರೆತ ಅನುಭವ ಅವಿಸ್ಮರಣೀಯ.
'ದೇವ ಸನ್ನಿಧಿ' ಎಂಬುದು ನಂಬಿಕೆ, ಶ್ರದ್ಧೆ, ಪರಂಪರೆಗಳ ಕುಂಭಮೇಳದ ಕುರಿತಾದ ಗಿರಿಜಾ ರೈಕ್ವಾ ಅವರ ಪ್ರಕಟಿತ ಕೃತಿ. ಈ ಕೃತಿಯ ಕುರಿತಾದ ಅವರ ಒಂದು ಮಾತು ಇಂತಿದೆ "ನಮ್ಮ ದೇಶದಲ್ಲಿ ರಾಮಾಯಣ, ಮಹಾಭಾರತ, ಭಾಗವತಗಳಿಗೆ ಸಂಬಂಧಪಡದ ನದಿಗಳಿಲ್ಲ, ಬೆಟ್ಟಗಳಿಲ್ಲ, ಯಾವ ಊರೂ ಇಲ್ಲ. ಹಾಗಾಗಿ ಇಡೀ ಭಾರತವೇ ಒಂದು ತೀರ್ಥಕ್ಷೇತ್ರ. ತೀರ್ಥಯಾತ್ರೆ ಅಭಯದ ಸಂಕೇತ. ಮನಸ್ಸಿಗೆ ಬಲ ಕೊಡುವ ಪ್ರಕ್ರಿಯೆ. ಭರವಸೆ ಕುಗ್ಗಿದಾಗ, ಚೈತನ್ಯ ತರುತ್ತದೆ. ಮನುಷ್ಯನ ತಿರುಗಾಟಕ್ಕೊಂದು ಆಧ್ಯಾತ್ಮಿಕ ಸ್ಪರ್ಶ ನೀಡುವುದೇ ತೀರ್ಥಯಾತ್ರೆ... ಪ್ರವಾಸ ಲೌಕಿಕ ಅನುಭವವನ್ನು ಕೊಟ್ಟರೆ, ತೀರ್ಥಯಾತ್ರೆ ಅಲೌಕಿಕ ಅನುಭವವನ್ನು ತಂದುಕೊಡುತ್ತದೆ". ಇದು ಅವರ ಚಿಂತನೆಗಳ ಸ್ವರೂಪಕ್ಕೊಂದು ನಿದರ್ಶನದಂತಿದೆ.
'ಗಿರಿಯಾನ' ಎಂಬುದು ಗಿರಿಜಾ ಅವರ ಬ್ಲಾಗ್ ( http://giriyana.blogspot.com/). ಅಲ್ಲಿ ಅವರ ವೈವಿಧ್ಯಮಯ ಪ್ರವಾಸಗಳ ಕುರಿತಾದ ಆಪ್ತ ವಿಚಾರಗಳಿವೆ. ‘ಗಿರಿ' ಎಂಬುದು ಗಿರಿಜಾ ಅವರ ಹೆಸರಿನ ಎರಡಕ್ಷರ. 'ಯಾನ' ಗಿರಿಜಾ ಅವರ ಪ್ರೀತಿ. ಹೀಗಾಗಿ ಅವರದು 'ಗಿರಿಯಾನ'. ಅವರಿಗೆ ಗಿರಿಗಳ ಕುರಿತಾದ ಅದರಲ್ಲೂ ಹಿಮಾಲಯದ ಕುರಿತಾದ ಯಾನಗಳ ಕುರಿತು ಅಪಾರ ಪ್ರೀತಿ. ಹಿಮಾಲಯದ ನಿವಾಸಿಯಾದ 'ಗಿರಿಜೆ'ಯ ಮೇಲೆ ಈ ಗಿರಿಜೆಗೆ ಅಕ್ಕರೆ ಸ್ವಾಭಾವಿಕ ತಾನೇ. ಹ್ಞಾ ಮತ್ತೊಂದು ವಿಚಾರ ಈಗ ಗಿರಿಜಾ ಬ್ಲಾಗ್ ಲೋಕದಿಂದ ಯೂಟ್ಯೂಬ್ ಲೋಕದಲ್ಲಿ
(https://www.youtube.com/@girijaraikva) ತಮ್ಮನ್ನು ಹೆಚ್ಚು ವ್ಯಾಪಿಸಿಕೊಂಡಿದ್ದಾರೆ.
ಗಿರಿಜಾ ತಮ್ಮನ್ನು 'ಹಗಲು ಕನಸು ಕಾಣುವಾಕೆ', 'ಪ್ರವಾಸಿ', 'ತಾಯಿ' ಮತ್ತು 'ಜಿಪ್ಸಿ' ಎಂದು ಕಂಡುಕೊಳ್ಳುತ್ತಾರೆ. ವೃತ್ತಿಯಲ್ಲಿ ಅವರು ಕಾರ್ಪೊರೇಟ್ ರಿಯಲ್ ಎಸ್ಟೇಟ್ ಮತ್ತು ಫೆಸಿಲಿಟೀಸ್ ಮ್ಯಾನೇಜ್ಮೆಂಟ್ ವೃತ್ತಿಯಲ್ಲಿದ್ದು, "ಕಾರ್ಪೋರೇಟ್ ವರ್ಕ್ ಸ್ಪೇಸ್ ಸೃಜನೆಯಲ್ಲಿ" ಅಪರಿಮಿತ ಒಲವುಳ್ಳವರಾಗಿದ್ದಾರೆ.
ವಿಶ್ವದೆಲ್ಲೆಡೆ ಸುತ್ತುವ ಹೊಂಗನಸನು ಹೊತ್ತಿದ್ದ ಗಿರಿಜಾ ಅವರಿಗೆ, ಯಾವುದೇ ಪರ್ಯಟನೆ ಸಾಧ್ಯವಾಗಿದ್ದು ಅವರು ಗಳಿಸಿದ ಸ್ವಾವಲಂಬನೆಯಿಂದ. ಕಾಲಿಗೆ ಚಕ್ರಕಟ್ಟಿಕೊಂಡು ಪರ್ಯಟನೆ ಕೈಗೊಳ್ಳುವ ಅವರ ಈ ಹವ್ಯಾಸಕ್ಕೆ ಅವರ ಪತಿ ಮತ್ತು ಮಗಳ ಸಹಕಾರವೂ ಇದೆ. ಗಿರಿಜಾ ಅವರ ಬ್ಲಾಗಿನಲ್ಲಿ ಮತ್ತು ಯೂಟ್ಯೂಬ್ ವಾಹಿನಿಗಳಲ್ಲಿ, ಅವರು ದೇಶದಲ್ಲಿ ಮತ್ತು ವಿದೇಶಗಳಲ್ಲಿ ಕಂಡುಕೊಂಡ ಅನುಭವಗಳಿವೆ. ಹೋದೆಡೆಗಳೆಲ್ಲಿ ಒಂದಷ್ಟು ತ್ರಾಸವೆನಿಸಿದರೂ ಕಾಲ್ನಡಿಗೆ ಅನುಭವವೂ ಅವರಿಗಿಷ್ಟ.
ಗಿರಿಜಾ ಅವರು ರಂಗ ಕಲಾವಿದೆ ಮತ್ತು ಕವಯಿತ್ರಿ ಕೂಡ. ಕಲಾಕಂಗೋತ್ರಿ ಅಂತಹ ಪ್ರಸಿದ್ಧ ತಂಡಗಳ ಅನೇಕ ನಾಟಕಗಳಲ್ಲಿ ಪಾತ್ರವಹಿಸಿದ್ದಾರೆ.
ಲೋಕದೃಷ್ಟಿಯ ಸುಂದರ ಕನಸುಳ್ಳ, ಕಾರ್ಪೊರೇಟ್ ಲೋಕಕ್ಕೆ ಸೌಕರ್ಯಯುತ ಸೃಜನಶೀಲ ಕಾರ್ಯಲೋಕವನ್ನು ಕಟ್ಟಿಕೊಡುವ ಸಾಮರ್ಥ್ಯವುಳ್ಳ, ಎಲ್ಲರಲ್ಲೂ ಆತ್ಮೀಯ ಭಾವ ಮೂಡಿಸುವ, ಬಹು ಸದಭಿರುಚಿಗಳ ಗಿರಿಜಾ ಅವರ ಬದುಕಿನ ಸುಖ ಪಯಣ ನಿರಂತರವಾಗಿರಲಿ ಎಂದು ಹಾರೈಸುತ್ತ ಅವರಿಗೆ ಹುಟ್ಟುಹಬ್ಬದ ಶುಭಕೋರೋಣ.
Happy birthday Girija Raikva 🌷🌷🌷
ಕಾಮೆಂಟ್‌ಗಳು