ಶ್ರೀಕೃಷ್ಣ ದರ್ಶನಕ್ಕೆ ಬಾಗಿಲ ತೆರೆಯಿರಣ್ಣ

Thiruppavai 16

ನಾಯಗನಾಯ್ ನಿನ್ರ ನಂದಗೋಪನುಡೈಯ

ಕೋಯಿಲ್ ಕಾಪ್ಪಾನೇ ಕೊಡಿತ್ತೋನ್ರುಂ ತೋರಣ 

ವಾಶಲ್‍ಕಾಪ್ಪಾನೇ ಮಣಿಕ್ಕದವಂ ತಾಳ್ ತಿರುವಾಯ್ 

ಆಯರ್ ಶಿರುಮಿಯರೋ ಎಮಕ್ಕು ಅರೈಪರೈ 

ಮಾಯನ್ ಮಣಿವಣ್ಣನ್ ನೆನ್ನೆಲೇ ವಾಯ್ನೇರ್‌ನ್ದಾನ್ 

ತೂಯೋಮಾಯ್ ವನ್ದೋಂ ತುಯಿಲೆಳಪಾಡುವಾನ್ 

ವಾಯಾಲ್ ಮುನ್ನ  ಮುನ್ನಂ ಮಾಟ್ರಾದೇ ಅಮ್ಮಾ ನೀ ನೇಶನಿಲೈಕ್ಕದವಂ ನೀಕ್ಕೇಲೋರೆಂಬಾವಾಯ್

ಭಾವಾನುವಾದ 16

ನಂದಗೋಪನರಮನೆಯ ದ್ವಾರಪಾಲಕನೆ ಜಯನೆ ವಿಜಯನೇ ರತ್ನಮಣಿ ಖಚಿತ ಬಾಗಿಲನು ತೆರೆಯಣ್ಣ ಬಂದಿಹೆವು ಗೋಪಬಾಲೆಯರು 

ಸುರರು ನಾವ್ ಸುವ್ರತನ ಗೆಳತಿಯರು 

ನೆರವಾಗು ಕೃಷ್ಣನದರ್ಶನಕೆ 

ಜಗನ್ನಾಥನಾ ದರ್ಶನಕೈದಿಹುದು ಮುನಿವೃಂದ ತಾಳದಂಡಿಗೆ ಪಿಡಿದು ನೀಡಿಹನಭಯವನು ಬದರಿನಾಥನೆಂದೈದಿಹವು ನೋಂಪಿಯನಾಚರಿಸಿ 

ನುಡಿದಿಹನು ಮುನ್ನವೇ ಇಷ್ಟಾರ್ಥಗಳ ಸಲಿಸುವೆನೆಂದತಿಶಯದಿ ಪ್ರೇಮಮೂರುತಿ ಕೃಷ್ಣೆಯಣ್ಣನ ದರ್ಶನಕೆ ಬಾಗಿಲನು ತೆರೆಯಣ್ಣ ಫಲಿಸಲಿಂತೆಲ್ಲರನುಪಮ ನೋಂಪಿ ತುಂಬುತೆಲ್ಲಡೆ ಮಂಗಳದ ಮುಂಬೆಳಕು

ಸಂಕ್ಷಿಪ್ತ ಭಾವಾರ್ಥ

ಇದುವರೆವಿಗೂ ಒಬ್ಬೊಬ್ಬರನ್ನಾಗಿ ತನ್ನೆಲ್ಲ ಸಖಿಯರನ್ನೂ ಎಚ್ಚರಿಸಿದ್ದಾಯ್ತು. ಇನ್ನು ಶ್ರೀಕೃಷ್ಣನಿಗೆ ರಕ್ಷಕರಾಗಿರುವ ಎಲ್ಲರನ್ನೂ ಪ್ರಾರ್ಥಿಸಿ ಅವರ ಅನುಜ್ಞೆಯನ್ನು ಪಡೆದುಕೊಂಡೇ ಹೋಗಬೇಕಲ್ಲವೇ? ಈ 16ರಿಂದ 20ರ ವರೆಗಿನ ಪದ್ಯಗಳು ಈ ಸಾಲಿಗೆ ಸೇರಿದವುಗಳು. 

ಮೊದಲಿಗೆ ನಂದಗೋಪನ ಅರಮನೆಯ ದ್ವಾರಪಾಲಕರನ್ನು ಹೊಗಳಿ ಅರಮನೆಗೆ ಪ್ರವೇಶವನ್ನು ಬಯಸಿದ್ದಾಳೆ ಗೋದಾದೇವಿ.

ಚಿನ್ನದ ಕುಸುರಿ ಕೆಲಸಗಳಿಂದ ಅಲಂಕೃತವಾದ ಬಾಗಿಲುಗಳ ಬಳಿ ಕೈಯಲ್ಲಿ ಗದೆಯನ್ನು ಹಿಡಿದು ಕಾಯುತ್ತಿರುವ ಜಯವಿಜಯರೇ ಬಾಗಿಲನ್ನು ತೆರೆಯಿರಿ. ನಮಗೆ ಶ್ರೀಕೃಷ್ಣನ ದರ್ಶನಕ್ಕೆ ಅವಕಾಶ ಮಾಡಿಕೊಡಿ. ನಾವು ಕೇವಲ ಗೋಪಾಲಕರೆಂದು ತಿಳಿಯಬೇಡಿರಿ. ನಾವುಗಳು ಸುರರು. ಶ್ರೀಕೃಷ್ಣನ ಲೋಕ ರಕ್ಷಣಾ ಕಾರ್ಯದಲ್ಲಿ ಆತನೊಡನೆ ಸಹಕರಿಸಲು ಬಂದವರು. ಜೊತೆಗೆ ಮುನಿವೃಂದವೂ ಸಹ ತಾಳದಂಡಿಗೆ ಪಿಡಿದು ಹಾಡುತ್ತಾ ಜಗನ್ನಾಥನ ದರ್ಶನಕಾಂಕ್ಷಿಗಳಾಗಿ ಬಂದಿದ್ದಾರೆ.

ಆಸೇತು ಹಿಮಾಲಯದಿಂದ ಕನ್ಯಾಕುಮಾರಿಯವರೆವಿಗೂ ಬೆಳಗಿರುವ ಈ ಭವ್ಯಭಾರತದ ಎಲ್ಲ ದಿವ್ಯಕ್ಕೇತ್ರಗಳಲ್ಲೂ ವಿರಾಜಮಾನವಾಗಿ ಭಕ್ತ ರಕ್ಷಕನಾಗಿರುವವನೇ ಈ ನಂದನಂದನನು ಎಂದು ಹೇಳಿ ಪರಿಚಯಿಸಿಕೊಂಡು ಬಾಗಿಲನ್ನು ತೆರೆಯಿರೆಂದು ಪ್ರಾರ್ಥಿಸಿದ್ದಾಳೆ.

ಮುಂದುವರಿಯುತ್ತಾ, ನೋಡಿ ದ್ವಾರಪಾಲಕರೇ ಮಧುರಾನಾಥನು ಈ ಮೊದಲೇ ನಮಗೆ ಮಂಗಳಕರವಾದ ಈ ಮಾರ್ಗಶಿರ ಮಾಸದ ವ್ರತವನ್ನು ಆಚರಿಸಿ ಬನ್ನಿ, ನಾನು ನಿಮಗೆ ಕೋರಿದ ವರಗಳನ್ನು ಕೊಟ್ಟು ಸಲಹುತ್ತೇನೆ ಎಂದು ತಿಳಿಸಿದ್ದಾನೆ. ಆದ್ದರಿಂದ ನಾವು ವ್ರತಧಾರಿಗಳಾಗಿ ಆತನ ಇಚ್ಛೆಯಂತೆ ಬಂದಿದ್ದೇವೆ. ಆದ್ದರಿಂದ ಬೇಗ ಅರಮನೆಯ ಬಾಗಿಲನ್ನು ತೆರೆಯಿರಣ್ಣ.  ಶ್ರೀಕೃಷ್ಣನ ದರ್ಶನದಿಂದ ನಮ್ಮವ್ರತವು ಈಡೇರಿ ಸಮಸ್ತ ಲೋಕಕ್ಕೂ ಮಂಗಳವಾಗಲಿ.

ಕೃಪೆ: ದಾಸಗೋಪಾಲ ಕಾವ್ಯನಾಮದ ಅರ್ಚಕ ವೇಣುಗೋಪಾಲ್ ಬಿ. ಎಸ್ ಅವರ ಶ್ರೀಗೋದಾದೇವಿ ಅನುಗ್ರಹಿಸಿದ ತಿರುಪ್ಪಾವೈ ಗೀತಮಾಲೆ

Art credits: Keshav (©KrishnaforToday)