ಸೋಮವಾರ, ಮಾರ್ಚ್ 31, 2014

ಯುಗಾದಿ ಸ್ವಾಗತ


ಬಾ ಬಾ ಯುಗಾದಿ ಬಾ
ನಮ್ಮ ಊರಿಗೆ
ಸುಸ್ವಾಗತ ನಿನಗೆ
ನೀರಿರದ ಕೇರಿಗೆ

ಸಿಗಲಿಲ್ಲವೆ ಸಿಟಿ ಬಸ್ಸು
ನಿರಾಶನಾದೆಯ?
ಆಟೋ ರೇಟನು ಕೇಳಿ
ಹೌಹಾರಿ ಹೋದೆಯ?
ನಡೆದೇ ಬಂದೆಯ ಕೊನೆಗೆ
ಬಿರುಬಿಸಿಲಲಿ ಮನೆಗೆ?
ಅಂತೂ ಬಂದೆಯಲ್ಲ
ಧನ್ಯವಾದ ನಿನಗೆ

ಅನ್ನವ ಕಂಡು ನಗಬೇಡ
ಸೊಸೈಟಿ ಅಕ್ಕಿ
ಗೋಡಂಬಿ ಸಿಕ್ಕೀತೆ ಖೀರಲ್ಲಿ?
ನೀನೇ ಲಕ್ಕಿ
ಫ್ಯಾನು ಹಾಕುವೆನು ಕೂತು ತಿನ್ನು
ಬಿಸಿ ಒಬ್ಬಟ್ಟು
ಬೇಕಾದ್ದನ್ನು ನೀ ಕೇಳು
ತುಪ್ಪವೊಂದು ಬಿಟ್ಟು

ಹಬ್ಬದ ದಿನವೆಂದು
ಹೋಗಿಲ್ಲ ಕರೆಂಟು
ರೇಡಿಯೋ, ಟೀವಿಯಲಿ
ವಿಶೇಷಗಳುಂಟು
ಕೋಗಿಲೆ ಹಾಡನು ಕೇಳು
ಆಕಾಶವಾಣಿಯಲಿ
ಕಂಡು ಧನ್ಯನಾಗು
ಹೂ ಚಿಗುರು ಟೀವಿಯಲ್ಲಿ

ಹೋಗಿ ಬಾರೋ ಯುಗಾದಿ
ಶುಭವಾಗಲಿ ನಿನಗೆ
ಹರಸಿ ಹೋಗು ನಮಗೆ
ಆಗಾಗ ಕೊಂಚ ನಗೆ.

ಸಾಹಿತ್ಯ: ಬಿ. ಆರ್. ಲಕ್ಷ್ಮಣರಾವ್




ಕಾಮೆಂಟ್‌ಗಳಿಲ್ಲ: