ಜೆ. ಬಿ. ರಂಗಸ್ವಾಮಿ

ಜೆ. ಬಿ. ರಂಗಸ್ವಾಮಿ ಅವರು ಕರ್ನಾಟಕ ಸರ್ಕಾರದ ಪೋಲೀಸ್ ಸೇವೆಯಲ್ಲಿ ಅಧಿಕಾರಿಗಳಾಗಿ ತಮ್ಮ ನಿಷ್ಠಾವಂತ ಸೇವೆಗೆ ಹೆಸರಾಗಿದ್ದವರು.  ಬರಹಗಾರಾಗಿ ಅವರು ಮೂಡಿಸುತ್ತಿರುವ ಬರಹಗಳು ಅದರ ವಿಶಾಲವ್ಯಾಪ್ತಿ, ಸರಳ ಬರವಣಿಗೆ, ಸಾಂಸ್ಕೃತಿಕ ಪ್ರೀತಿ ಮತ್ತು ವಿದ್ವತ್ತುಗಳಿಂದ ಶೋಭಿತವಾಗಿವೆ.

ನವೆಂಬರ್ 6 ರಂಗಸ್ವಾಮಿ ಅವರ ಹುಟ್ಟುಹಬ್ಬ.  ಹಾಸನ ಮತ್ತು ಮೈಸೂರಿನಲ್ಲಿ ಓದಿದ ಅವರು ಎಂ.ಎ. ಮತ್ತು ಎಲ್.ಎಲ್.ಬಿ. ಓದಿದರು.

ರಂಗಸ್ವಾಮಿ ಅವರು ಪೊಲೀಸ್‌ ಅಧಿಕಾರಿಗಳಾಗಿ ಸೇವೆ ಸಲ್ಲಿಸಿ ನಿವೃತ್ತರಾಗಿದ್ದಾರೆ.  

ಜೆ. ಬಿ. ರಂಗಸ್ವಾಮಿ ಅವರ ವಿಶಾಲ ವ್ಯಾಪ್ತಿಯ ಬರಹಗಳು ಅಂಕಣಗಳಲ್ಲಿ ಮತ್ತು ಫೇಸ್ಬುಕ್ ಆವರಣದಲ್ಲಿ ಅತ್ಯಂತ ಆಪ್ತತೆ ಹುಟ್ಟಿಸುವಂತಿವೆ. 'ನಿನ್ನೆ ಮೊನ್ನೆ ನಮ್ಮ ಜನ' ಎಂಬುದು ಅವರ ಪ್ರಸಿದ್ಧ ಅಂಕಣ.   ಇದರ ಸಂಕಲನ ಪುಸ್ತಕ ರೂಪವೂ ವ್ಯಾಪಕ ಮೆಚ್ಚುಗೆ ಪಡೆದಿವೆ. ಇದರ ಕುರಿತಾದ ಪತ್ರಿಕೆಯೊಂದರಲ್ಲಿ ಮೂಡಿಬಂದ ಮೆಚ್ಚಿನ ಮಾತು ಇಂತಿದೆ:

"ಕ್ರಾಂತಿ, ಯುವದಿನಗಳ ಹುಮ್ಮಸ್ಸು, ವೃತ್ತಿ ಬದುಕಿನ ಅನುಭವಗಳು ಎಲ್ಲವನ್ನೂ ಒಂದು ಕಡೆ ರಾಶಿ ಹಾಕಿ ಕಟ್ಟಿಕೊಟ್ಟಿದೆ ಈ ಕೃತಿ. ಇಲ್ಲಿ ನಾಡು ನುಡಿಯ ಹೋರಾಟದಲ್ಲಿ ತೊಡಗಿಸಿಕೊಂಡ ನೆನಪುಗಳಿವೆ. ವಿದ್ಯಾರ್ಥಿ ಜೀವನದಲ್ಲಿ ಕುಲಪತಿಯವರಿಗೇ ತಿರುಗಿಬಿದ್ದ ಘಟನೆಗಳ ವಿವರಗಳಿವೆ. ದೇವೇಗೌಡರ ಒಡನಾಟ ಮತ್ತು ಮಹತ್ವದ ಘಟನೆಗಳ ಉಲ್ಲೇಖವಿದೆ. ಕೃತಿಯ ಕೆಲವು ಲೇಖನಗಳು ಒಂದೇ ಗುಕ್ಕಿನಲ್ಲಿ ಓದಿಸಿಕೊಂಡು ಹೋಗುತ್ತವೆ. ವೃತ್ತಿ ಬದುಕಿನ ಅನುಭವಗಳು, ಘಟನೆಗಳು ಒಂದಿಷ್ಟು ದಾಖಲೆಗಳಾಗಿ ಇಲ್ಲಿವೆ. ಪೈಲ್ವಾನ್‌ ರುದ್ರ (ಮೂಗ), ಪ್ರಮೋದಾ ದೇವಿ ಅವರ ಬಗೆಗಿನ ಲೇಖನಗಳು, ಇಂದಿರಾಗಾಂಧಿಯವರ ಬಂದೋಬಸ್ತಿನಲ್ಲಿ ತೊಡಗಿದ್ದ ಅನುಭವಗಳು, ವಿಷ್ಣುವರ್ಧನ್ ಅವರ ಕಾರ್ಯಕ್ರಮಕ್ಕೆ ಭದ್ರತೆ... ಇವೆಲ್ಲಾ ಮೈಸೂರಿನ ಸಾಮಾಜಿಕ, ಸಾಂಸ್ಕ್ರೃತಿಕ ನೆನಪುಗಳನ್ನು ತೆರೆದಿಟ್ಟಿವೆ. ವೃತ್ತಿಬದುಕಿನಲ್ಲಿ ಅನುಭವಿಸಿದ ಕಸಿವಿಸಿಗಳನ್ನು ಮುಲಾಜಿಲ್ಲದೇ ಲೇಖಕರು ಹೇಳಿಕೊಂಡಿದ್ದಾರೆ. ಹಾಗಾಗಿ ಇದರಲ್ಲಿ ಸಹಜ ನಿರೂಪಣೆ ಇದೆ. ಪ್ರೊ.ಕೃಷ್ಣೇಗೌಡರ ಮುನ್ನುಡಿಯೇ ಓದಿಗೊಂದು ಒಳ್ಳೆಯ ಆರಂಭ ಕೊಟ್ಟಿದೆ. ಸಾಮಾನ್ಯರಲ್ಲಿ ಸಾಮಾನ್ಯರಾಗಿ, ಅಧಿಕಾರಿಯಾಗಿ,

ಬರಹಗಾರರಾಗಿ ಲೇಖಕರ ಅರಿವಿನ ವಿಸ್ತಾರ ಮತ್ತು ಜೀವನಾನುಭವವನ್ನು ಕಟ್ಟಿಕೊಟ್ಟಿದೆ."

ರಂಗಸ್ವಾಮಿ ಅವರು ತೆರೆದಿಡುವ ಸರ್ಕಾರಿ ಸೇವೆಯ ವಾಸ್ತವಿಕತೆಗಳು, ಸಾಮಾನ್ಯ ಜನರ ಹಿರಿಯತನ, ಸಂಗೀತ - ಸಾಹಿತ್ಯ - ಸಂಸ್ಕೃತಿಗಳ ಒಲವು, ಕೃಷಿಕರು ಮತ್ತು ಗ್ರಾಮೀಣ ಬದುಕಿನ ಸವಾಲುಗಳು ಇತ್ಯಾದಿ ಅನೇಕ ಬರಹಗಳು ಅವರ ಬದುಕಿನ ಕುರಿತಾದ ಸೂಕ್ಷ್ಮ ಪ್ರಜ್ಞೆ ಮತ್ತು ಹೃದಯವಂತಿಕೆಯನ್ನು ಹೊರಸೂಸುವಂತಿವೆ.

ಎಷ್ಟೊಂದು ಸಾಧಿಸಿದ್ದರೂ ಒದಿನಿತೂ ಗರ್ವ ಸಮೀಪಿಸದ ಸಹೃದಯಿ ಜೆ. ಬಿ. ರಂಗಸ್ವಾಮಿ ಅವರಿಗೆ ಹುಟ್ಟುಹಬ್ಬದ ಹಾರ್ದಿಕ ಶುಭಹಾರೈಕೆಗಳು.

Happy birthday Jbrswamy Rangaswamy  Sir🌷🙏🌷